زعمت فتاة من خلال فيديو نشرته على مواقع التواصل الاجتماعي، اعتداء أحمد عادل لاعب النادي الأهلي السابق على والدها، والذي أسفر عن إصابة والدها بكسور وجروح حادة في جسمه بسبب خناقة أطفال أثناء تواجدهما في مارينا بالساحل الشمالي.
اعتداء لاعب الأهلي السابق على شخص بالساحل الشمالي
وشاركت الفتاة التي تدعى فرح مصطفي، فيديو لها من خلال منصة تيك توك وانستجرام، فيديو زعمت من خلاله أن والدها تعرض لواقعة اعتداء حادة من أحمد عادل لاعب الأهلي السابق في مارينا بالساحل الشمالي، مضيفة أن ” أبويا كان مع أخويا علي الصغير اللي عمره 6 سنين في مارينا، وكان أخويا الصغير بـ يلعب مع ابن لاعب الكرة أحمد عادل، وعوّر أخويا بـ خربوش في رأسه، ولما بابا شاف اللي حصل بعدهم عن بعض وقالهم متزعلوش من بعض خلاص، وأخذ أخويا الصغير في مطعم عشان ياكلوا”.
وأضافت فرح مصطفي: “في المطعم، لقى صاحب المحل جاي بيقول له في واحد عايزك برا، ولما خرج لقى أحمد عادل بيتكلم بـ أسلوب غير محترم وبـ صوت عالي، فـ أبويا رد عليه وقاله الموضوع بسيط وخلاص اتحل، بعدها بدأ كابتن أحمد عادل بالتلامس مع والدي وزقه في كتفه وبابا شال إيده وقال له ماينفعش تكلمني كده.. إحنا أكبر من كده، اتكلم معايا بـ أسلوب كويس، لكن هو فضل يكرر أسلوبه ويزقه في كتفه وفي وشه رغم أن بابا كان بيشيل إيده في كل مرة”.
واستكملت الفتاة حديثها بقولها: “فجأة بابا لقى 4 ستات ماسكين في إيده الاتنين ورجله الشمال ورقبته، وراح أحمد عادل كاسر لـ بابا رجله وضربه، الموضوع مكنش يستاهل مستحق إنك تيجي تتناقش فيه، أخويا اللي متعور.. دي بلطجة، أنا مشوفتش كدة في حياتي”، مشيرة إلى أنها اتخذت كافة الإجراءات القانونية اللازمة وتم تحرير محضر بالواقعة وما زالت التحقيقات الأمنية جارية.