كشف أحد الناجين من حادث أتوبيس جامعة الجلالة عن المعاناة التي عاشها الطلاب والتي راح ضحيتها 12 حالة وفاة و33 مصابا بحسب بيان وزارة الصحة، معلنا السبب الحقيقي وراء الحادث من خلال شهادة شقيقته عقب شفائها.
حادث طريق الجلالة
وقال شفيق إحدى مصابي حادث طريق الجلالة عبر حسابه على مواقع التواصل الاجتماعي: الحمد لله بعد أكثر من 22 ساعة رجعنا البيت وشقيقتي المصابة معانا، الحمد لله هي كويسة وبخير، مضيفا: علشان أبرئ ذمتي من ربنا فيه ناس بتحاول تشيل السواق الموضوع علشان يحافظوا على نفسهم، من خلال كلام أختي السواق كان في حالة طبيعية ماكنش ماشي بالسرعة الجنونية اللي بيقولوا عليها”.
طريق الجلالة
وتابع: وهما في الطريق شموا ريحة شياط في الباص ولما حاولوا يقولوا للسواق السواق كان بينكر علشان ميسببش حالة ذعر بين الطلاب، ولكن لما السواق حاول يدوس فرامل علشان يعرف يدخل الملف الفرامل فصلت منه وكان قدامه حل من اتنين إما مش هيعرف ياخد الملف بسرعة ويقع من على الجبل أو أنه يقلب الاتوبيس على الجنب التاني علشان مايقعوش وده اللي حصل”.
وتابع شقيق طالبة جامعة الجلالة المصابة: قبل ما يقلب الباص نده على كل الطلاب وقالهم امسكوا كويس علشان هنقلب الباص على الجنب البعيد عن الجبل، وكان لازم الموضوع ده يتحكي بالتفاصيل لأنها كل ما تحصل حادثة التفاصيل ما بتبقاش كاملة وخصوصا بعد خبر إن السواق كان يتعاطى المخدرات ولكن السواق كان باين في حالة طبيعية”.
وفي السياق ذاته أكدت النيابة العامة أن السبب في حادث أتوبيس طريق الجلالة هو سير سواق الأتوبيس بسرعة هائلة حال مروره بمنعطف منحدر، فاختلت القيادة وانقلبت الحافلة، وأمر النائب العام بتشكيل فريق تحقيق برئاسة المحامي العام الأول لنيابات السويس الكلية لمباشرة إجراءات التحقيق في حادث انقلاب حافلة ركاب طريق الجلالة.