شن أحمد شوبير حارس مرمى النادي الأهلي السابق، هجوم قاسي على أحمد حسام ميدو وأيمن عبدالعزيز بعد التصريحات التي أدلوا بها بخصوص تشجيع الأهلي فى كأس العالم للأندية بعد وقوعه مع إنتر ميامي فى المجموعة الأولى.
وقال أحمد شوبير عبر قناة الأهلي: “أنا زعلان من جمهور الأهلي من بعد قرعة كأس العالم للأندية، شاغلين نفسكم ليه؟ عيب والله! أنت ليه بترد على حد غيران منك؟ ما هو واحد مش قادر يقرب من كعب الجزمة بتاعك! دي الحقيقة.”
أكمل:”الأهلي في الدور الألف في العمارة، وحد تاني بيتلمس الدور الأول. طموحهم يكونوا في الدور السادس، وهو بيحاول يقارن نفسه بيك عشان يحس بالنقص اللي عنده!”
واضاف: “طب حد يقولي، حط نفسك مكانهم وهما بيشوفوا البنت الجميلة وهي مبهورة لما سحبت اسم الأهلي، أو لما ديل بييرو نجم إيطاليا بيقول الأهلي الأكثر تتويجًا ونادي القرن! سيبوهم في حالهم، ربنا يكون في عونهم بصراحة.”
وأكمل: “يا جمهور الأهلي، أنت لو نمت 10 سنين وصحيت من النوم هتكون لسه متفوق عليهم! أنت بتشجع أعظم نادي في مصر وأفريقيا وواحد من أعظم أندية العالم،إنتركونتننتال، وبرونزية كأس العالم 4 مرات، وأفريقيا 12 مرة ولسه هتشارك في كأس العالم للأندية وهتواجه ميسي في لقاء رسمي! وريال مدريد للمرة الثانية في لقاء رسمي.”
وأوضح: “يا جماعة المسافات بعيدة أوي والله، ومن حقهم يتجننوا! شوف أنت بتنافس مين وطموحك إيه، وهما طموحهم إيه وبينافسوا مين! كبر دماغك من الكلام الفارغ ده يا جمهور الأهلي، إحنا ورانا تحديات كبيرة، وبالمناسبة، مش عاوزين حد يشجع الأهلي، إحنا عندنا جماهيرنا ومشجعينا ومبسوطين”.