مع تقلب أسعار البطاطس، تلجأ الكثير من السيدات إلى تخزين كميات كبيرة للاستفادة منها طوال العام، خاصة خلال شهر رمضان والمواسم التي يزيد فيها الطلب عليها لكن المشكلة التي تواجه الكثيرات هي كيفية حفظها بطريقة صحيحة تمنعها من السواد، الذبول، أو الإنبات في هذا المقال، هنتعرف على الطريقة المثالية لتفريز البطاطس وحفظها لمدة سنة كاملة وكأنها لسه طازجة.
إزاي تختاري البطاطس المناسبة للتخزين؟
قبل ما تبدأي في تخزين البطاطس، لازم تختاري الحبات بعناية عشان تضمني نتيجة ممتازة، وإليكِ بعض النصائح:
- اختاري البطاطس اللي قشرتها سليمة ومفيهاش بقع أو تجاعيد.
- يفضل تكون متوسطة الحجم عشان تبقى سهلة التقطيع والتخزين.
- اغسليها كويس جدًا عشان تتخلصي من أي أتربة أو شوائب.
- ممكن تقشريها أو تسيبي القشرة حسب استخدامكِ.
- قطعيها بالشكل اللي يناسب استخدامكِ، سواء أصابع للقلي، مكعبات، أو شرائح.
الطريقة الصح لتفريز البطاطس لمدة سنة
- في حلة على النار، اغلي كمية مناسبة من المياه مع رشة ملح.
- ضيفي البطاطس المقطعة للمياه المغلية وسيبيها لمدة 2-3 دقائق.
- انقلي البطاطس فورًا لماء مثلج عشان توقفي عملية السلق وتحافظي على لونها وقوامها.
- جففيها كويس جدًا باستخدام ورق مطبخ أو منشفة نظيفة.
- رشي عليها نقطة زيت بسيطة عشان متلزقش في بعضها أثناء التفريز.
- وزعيها في أكياس تفريز محكمة الإغلاق أو علب بلاستيك، وتأكدي من تفريغ الهواء منها تمامًا.
- خزنيها في الفريزر، وهتفضل صالحة لمدة من 6 لـ 12 شهر بنفس الجودة والطعم.
إزاي تستخدمي البطاطس المجمدة؟
لو هتقليها، حطيها على طول في الزيت السخن بدون فك التجميد.
لو هتستخدميها في الأكلات المطبوخة زي الشوربة أو اليخنات، حطيها مباشرة في الحلة أثناء الطهي.
ممكن كمان تشويها في الفرن مع البهارات والزيت عشان تطلعي منها وصفات صحية ولذيذة.