الكوسا من الخضروات اللي ناس كتير بتحبها بسبب طعمها الخفيف وسهولة هضمها، وكتير من الأمهات بيقدموها للأطفال والمرضى عشان قيمتها الغذائية العالية لكن اللي ناس كتير متعرفوش إن الكوسا ممكن تبقى سامة في بعض الحالات! بعض الدراسات أكدت إن لو كان طعمها مر، فهي ممكن تحتوي على مواد ضارة تهدد الصحة وعلشان كده، لازم نعرف إزاي نتجنب الخطر ده ونختار الكوسا الآمنة.
ليه الكوسا ممكن تكون سامة؟
الخضروات اللي بتنتمي لعائلة القرعيات، زي الكوسا والقرع والخيار، فيها مادة طبيعية اسمها الكوكربيتاسين، وهي مادة بتساعد النباتات على الحماية من الحشرات، لكن المستويات العالية منها ممكن تبقى سامة للبشر العادة إن المزارعين بيقللوا المادة دي في المحاصيل، لكن أحيانًا بسبب عوامل معينة، الكوسا بتحتوي على نسب عالية منها وده بيخليها خطر على الصحة.
إزاي تتجنب الكوسا السامة؟
خبراء التغذية بينصحوا بتجنب أكل الكوسا لو كان طعمها مر، لأن ده دليل على احتوائها على نسبة عالية من السموم مديرة مكتب الفحص الكيميائي في شتوتجارت، ماريا روث، أكدت إن الطهي مش بيقلل من خطورة المادة دي، وعشان كده، لازم دايمًا تتذوق قطعة صغيرة قبل الطبخ ولو لقيت طعمها مر، ارميها فورًا.
خطورة زراعة الكوسا في البيت
لو بتزرع الكوسا في البيت، خد بالك إن في احتمال إنها تتعرض للطفرات الجينية اللي تزود نسبة الكوكربيتاسين، خصوصًا لو كان في قرعيات برية قريبة منك. وعشان تتجنب المشكلة دي، لازم تتأكد من مصدر البذور اللي بتزرعها وتراقب طعم المحصول قبل الأكل.
الكوسا من الأكلات المفيدة، لكن لازم تكون حريص قبل ما تاكلها لو حسيت إن طعمها مر، الأفضل إنك تتخلص منها فورًا عشان تحمي صحتك وصحة عيلتك الاهتمام بالتفاصيل البسيطة ممكن يمنع مشاكل صحية خطيرة
أنت في غنى عنها!