“من النهارده مفيش حيرة ولا قلق خالص!”.. دلوقتي تقدري تحفظي البقدونس والشبت طازة طول السنة بطريقة سهلة وبسيطة من غير ما يغيروا لونهم أو يفقدوا طعمهم نهائي!

البقدونس والشبت من الأعشاب اللي بنستخدمها يوميًا في المطبخ، لكن للأسف بيذبلوا بسرعة ويفقدوا نضارتهم، وعشان كده، التخزين الصح هو الحل! أول حاجة لازم تغسليهم كويس جدًا بالمياه الجارية، وبعدها تسيبيهم ينشفوا تمامًا على فوطة نظيفة أو مناديل مطبخ عشان الرطوبة ما تخليشهم يعفنوا بسرعة، بعد ما ينشفوا، قعيهم حسب استخدامك، سواء فرم ناعم أو قطع كبيرة، عشان يبقوا جاهزين على طول لما تحتاجيهم.

التجميد هو الحل السحري

لو عاوزة تحافظي على اللون الأخضر والطعم الفريش للبقدونس والشبت، يبقى التجميد هو أفضل طريقة، وبعد التقطيع، وزعيهم في أكياس صغيرة أو علب محكمة الغلق، وضعيهم في الفريزر، كمان ممكن تجربي طريقة المكعبات، وده عن طريق توزيع البقدونس أو الشبت في قوالب التلج وصب شوية مياه أو زيت عليهم، وبعد ما يجمدوا تحفظيهم في كيس بالفريزر، والطريقة دي مش بس بتحافظ على النكهة، لكنها كمان بتسهل عليكي الاستخدام، خصوصًا في الشوربات والطواجن.

حفظهم في التلاجة لأطول وقت ممكن

لو مش عاوزة تجمديهم، ممكن تحفظيهم في التلاجة بطريقة ذكية تخليهم طازة لأطول وقت، لفيهم في ورق مطبخ أو فوطة قطنية، وبعدها حطيهم في كيس بلاستيك مثقوب أو علبة محكمة الغلق، وخليها في درج الخضار، والطريقة دي بتقلل الرطوبة الزائدة وتحافظ عليهم من الذبول السريع، جربي أي من الطرق دي، وهتلاقي البقدونس والشبت عندك طول السنة بنفس اللون والطعم، من غير أي مجهود إضافي.