كتير من الناس بيرموا زيت القلي المستعمل بعد استخدامه، معتقدين إنه مالوش أي قيمة، لكن الحقيقة إنه ممكن يكون مصدر دخل إضافي وفرصة للاستفادة منه بطرق مختلفة بدل ما يتحول لمخلفات ضارة بالبيئة، وبدل ما ترميه في الحوض وتسبب انسداد المواسير أو تلقيه في القمامة، تقدر تعيد تدويره وتستخدمه في حاجات مفيدة جدًا، وكمان تكسب فلوس من بيعه.
إزاي تستفيد من زيت القلي المستعمل
في طرق كتير لإعادة استخدام زيت القلي بطريقة ذكية، منها:
1. صناعة الصابون: ممكن تستعمله في صنع صابون منزلي طبيعي لغسيل الأطباق أو الملابس، وده بيكون اقتصادي وصديق للبيئة.
2. وقود حيوي: بعض المصانع والشركات بتستخدم الزيوت المستعملة في إنتاج وقود الديزل الحيوي، اللي بيستخدم في تشغيل بعض المركبات والآلات، وده بيساعد في الحفاظ على البيئة.
3. تلميع الأثاث والمعادن: ممكن تستعمل زيت القلي القديم في تنظيف الأثاث الخشبي أو الأواني المعدنية، هيديها لمعة ويحافظ عليها من الصدأ.
4. صناعة شموع منزلية: بإضافة شمع البرافين أو شمع العسل للزيت، تقدر تصنع شموع تدوم لفترة طويلة وتوفر في استهلاك الكهرباء.
إزاي تبيع زيت القلي المستعمل وتكسب منه
في شركات ومصانع كتير بتشتري زيت القلي المستعمل لإعادة تدويره، وده بيخليك تستفيد منه بدل ما يكون عبء عليك، تقدر تجمع الزيت في زجاجات أو جراكن، وتبحث عن أماكن بتشتريه، سواء مصانع الصابون، شركات الوقود الحيوي، أو محلات متخصصة في إعادة التدوير، بعض الشركات كمان بتوفر خدمة استلام الزيت من المنزل، وبتدفع مقابل كويس حسب الكمية اللي بتوفرها.
بدل ما يكون زيت القلي المستعمل مشكلة، حوله لفرصة واستفد منه بطرق مبتكرة، سواء للاستخدام الشخصي أو لتحقيق دخل إضافي بكل سهولة.