كتير من الناس بيعانوا من مشكلة زفارة الفراخ، وده بيخلي طعم الأكل مش حلو حتى لو الطبخة متظبطة، بس متقلقيش، لأن في وصفات سهلة وسريعة تقدر تخلصك من الزفارة تماما وتخلي الفراخ طعمها روعة زي المطاعم، في المقال ده، هنقولك على طرق مجربة ومضمونة هتخليكي تستمتعي بألذ طعم للفراخ بدون أي ريحة مش مستحبة.
1. استخدام الليمون والملح لتنظيف الفراخ
الليمون والملح من أقوى المكونات اللي بتساعد على إزالة الزفارة، وقطعي ليمونة نصين، وافركي بيها الفراخ كويس من كل ناحية، وبعدها رشي عليها ملح وسيبيها 10 دقايق قبل الشطف، الطريقة دي بتساعد في إزالة أي رائحة غير مرغوبة بسرعة.
2. نقع الفراخ في ماء وخل
الخل معروف بقدرته على امتصاص الروائح القوية وتنظيف اللحوم، حطي الفراخ في طبق عميق، واغمريها بمياه مع ملعقة كبيرة من الخل الأبيض، وسيبيها لمدة 15 دقيقة، وبعدها اغسليها بمياه جارية، هتلاحظي إن الزفارة راحت تماما.
3. استخدام الدقيق والملح لتنظيف أعمق
الدقيق بيشتغل كمنظف طبيعي بيساعد في سحب أي زفارة موجودة في الفراخ، رشي كمية كويسة من الدقيق مع ملعقة صغيرة من الملح، وافركي الفراخ بيها لمدة دقيقتين، وبعد كده اشطفيها بمياه باردة، الطريقة دي هتديكي نتيجة مبهرة.
4. الزنجبيل والخلطة السحرية لإزالة الزفارة
لو عايزة تضيفي نكهة حلوة للفراخ، جربي نقعها في خليط من الزنجبيل المبشور، الخل، والمياه لمدة 20 دقيقة، الزنجبيل ليه قدرة قوية على إزالة الروائح غير المرغوبة وكمان بيخلي طعم الفراخ أحلى بكتير.
5. البصل واللبن.. تركيبة رهيبة للقضاء على الزفارة
من الحيل اللي بتستخدمها الشيفات المحترفين هي نقع الفراخ في اللبن مع شرايح بصل لمدة نص ساعة، اللبن بيمتص أي روائح مزعجة، والبصل بيديلها طعم حلو بيحسن نكهتها بشكل ملحوظ.