البنطلون الجينز من أكتر أنواع الملابس انتشارًا في العالم، وكلنا بنلبسه بشكل يومي، لكن هل عمرك وقفت عند الجيب الصغير الموجود في الجينز وسألت نفسك ليه موجود؟ ورغم إن معظمنا مش بيستخدمه، لكنه موجود في كل تصميمات الجينز تقريبًا من زمان جدًا، الحقيقة إن الجيب ده ليه قصة طويلة، والسبب وراه هيفاجئك جدًا.
ليه الجيب الصغير ده موجود في الجينز؟
الجيب الصغير ده ظهر لأول مرة في القرن الـ 19 مع ماركة “ليفايز” الشهيرة، وكان الهدف الأساسي منه إنه يكون مكان مخصص لحفظ ساعات الجيب اللي كانت منتشرة وقتها، العمال والمزارعين في أمريكا زمان كانوا بيستخدموا الساعات دي، وكانوا محتاجين مكان آمن يحفظها بعيد عن التلف، فكان الحل المثالي إنهم يضيفوا الجيب الصغير ده في البنطلون.
هل الجيب الصغير له استخدامات تانية؟
رغم إن الساعات الجيب بقت نادرة دلوقتي، لكن الجيب الصغير لسه موجود وبيستخدم في حاجات مختلفة، زي:
- حفظ العملات المعدنية علشان متتبعترش في الجيوب الكبيرة.
- تخزين مفاتيح صغيرة أو فلاشات USB.
- إخفاء أوراق نقدية أو حاجات صغيرة بشكل آمن.
- بعض الناس بتستخدمه لحفظ الخواتم أو قطع المجوهرات الصغيرة أثناء السفر.
ليه لسه الجيب ده موجود في البنطلونات الجينز الحديثة؟
بالرغم من إن الاستخدام الأصلي للجيب الصغير انتهى تقريبًا، لكن مصممي الأزياء بيحتفظوا بيه كجزء من التصميم الكلاسيكي للجينز، وجوده بقى تقليد متوارث في صناعة الجينز، وكتير من الناس بتحبه كعلامة مميزة في تصميم البنطلونات، حتى لو مش بيستخدموه فعليًا.
خرافات عن الجيب الصغير في الجينز
بعض الناس كانوا فاكرين إن الجيب ده مجرد جزء ديكوري أو تصميم شكلي، لكن الحقيقة إنه كان ليه وظيفة عملية حقيقية في الماضي، وفي ناس تانية بتعتقد إنه مخصص لحمل الولاعات أو للعملات المعدنية، لكن الاستخدام الأصلي كان لحفظ ساعات الجيب.