وجود تعابين في البيت ممكن يكون كابوس لأي حد، وكتير من الناس مش بتاخد بالها إن في إشارات واضحة بتدل على وجوده، التعابين بتدور على أماكن دافية ورطبة عشان تختبئ فيها، وده بيخلي البيوت بيئة مناسبة ليها، خصوصًا في المناطق القريبة من الأراضي الزراعية أو الأماكن اللي فيها فتحات وسقف منخفض، في المقال ده، هنقولك العلامات اللي لو لاحظتها، لازم تاخد حذرك فورا وتتصرف بسرعة.
1- وجود آثار زحف غريبة على الأرض
لو لاحظت خطوط متعرجة أو علامات زحف غير معتادة على الأرض، خصوصًا في الأماكن اللي فيها تراب أو غبار، فده ممكن يكون دليل على مرور تعبان في المكان، التعابين بتتحرك بطريقة مميزة، وبتسيب وراها أثر واضح لو كنت مركز.
2- سماع أصوات هسهسة أو حركة خفيفة
التعابين مش بتصدر أصوات عالية، لكنها ساعات بتعمل هسهسة خفيفة أو صوت احتكاك لما بتتحرك، لو سمعت صوت غريب في ركن معين من البيت، خصوصًا في الليل، فالأفضل إنك تتحقق من المكان كويس قبل ما تلمسه.
3- وجود فضلات غير معتادة
التعابين بتسيب فضلاتها في الأماكن اللي بتختبئ فيها، ودي بتكون عبارة عن كتل صغيرة غامقة اللون وممكن تحتوي على بقايا عظام أو ريش لو التعابين بتاكل فئران أو عصافير، ولو لقيت حاجة شبه كده في البيت، فالأفضل تتأكد إن المكان آمن.
4- اختفاء الفئران أو الطيور الصغيرة فجأة
لو كنت بتلاحظ دائما وجود فئران أو عصافير في البيت وفجأة اختفوا تمامًا بدون سبب، فده ممكن يكون علامة على وجود تعبان بيتغذى عليهم، التعابين بتقضي على الفرائس بتاعتها بسرعة، وده بيكون سبب في قلة ظهور القوارض أو الحشرات في المكان.
5- وجود جلد تعبان متساقط
التعابين بتبدل جلدها كل فترة، ولو لقيت قطعة جلد قديمة على شكل تعبان في أي ركن أو فتحة في البيت، فده دليل قاطع إن في تعبان مستخبي في المكان. الجلد ده بيكون على شكل أنبوب طويل وشفاف، وغالبا بيظهر جنب الجدران أو في الزوايا المهجورة.