واتساب بقى من أهم وسائل التواصل في حياتنا اليومية، لكن مع التطور التكنولوجي زادت حالات الاختراق والتجسس على الحسابات الشخصية، كتير من الناس مش بتاخد بالها إن حسابها ممكن يكون متراقب أو مخترق، وده بيسبب مشاكل كبيرة زي سرقة البيانات أو حتى انتحال الشخصية، في المقال ده، هنقولك العلامات اللي لو ظهرت عندك، يبقى لازم تتصرف فورا لحماية خصوصيتك.
1- رسائل مش مرسلة منك بتظهر في المحادثات
لو لاحظت إن في رسائل غريبة متبعتة من حسابك لناس من غير ما تكون انت اللي بعتها، فده دليل واضح إن في حد داخل على واتساب بتاعك وبيستخدمه بدون علمك، لازم تتأكد إن حسابك مش متصل من أي جهاز غريب.
2- بطء مفاجئ في التطبيق أو استهلاك عالي للبطارية
لو واتساب بقى بطيء جدًا فجأة أو البطارية بتخلص بسرعة غير طبيعية، فده ممكن يكون بسبب برنامج تجسس شغال في الخلفية. البرامج دي بتراقب نشاطك وتبعت البيانات لجهة خارجية، وده بيستهلك موارد الموبايل بشكل غير طبيعي.
3- إشعارات تسجيل دخول من أجهزة غريبة
واتساب بقى بيوفر ميزة اسمها “الأجهزة المرتبطة”، واللي بتسمح لك تعرف مين اللي داخل على حسابك من أي جهاز تاني، ولو لقيت جهاز مش بتاعك في القائمة، فده معناه إن حد تاني بيستخدم حسابك بدون إذنك.
4- صوت المكالمات مش واضح أو فيه تشويش غريب
لو بتعمل مكالمة على واتساب وبتلاحظ إن الصوت متقطع أو فيه صدى غريب، فده ممكن يكون دليل على إن المكالمة متراقبة أو متسجلة من طرف ثالث، لازم تكون حريص وتستخدم شبكة إنترنت موثوقة عشان تتأكد إن ده مش عيب فني.
5- ظهور رسائل مقروءة رغم إنك ما فتحتهاش
لو لقيت رسائل عندك متعلم عليها إنها “مقروءة” رغم إنك ما فتحتهاش، فده معناه إن في حد تاني شايف محادثاتك. دي من أخطر العلامات اللي بتأكد إن حسابك مش آمن ولازم تتصرف بسرعة.
6- تسجيل خروج مفاجئ من الحساب
لو واتساب خرجك فجأة وطلب منك تسجيل الدخول برقمك من جديد، فده معناه إن في حد حاول يدخل على حسابك من جهاز تاني. لو ده حصل، لازم تغير كلمة المرور فورا وتحمي حسابك بخطوتين.
7- وجود جهات اتصال أو مجموعات جديدة مش عارف عنها حاجة
لو لقيت أرقام غريبة أو جروبات جديدة في حسابك من غير ما تكون انت اللي ضفتها، فده معناه إن حد متحكم في حسابك وبيستخدمه بدون علمك، لازم تمسح أي جهات اتصال مش معروفة وتراجع إعدادات الأمان.