مع دخول الشتاء وانخفاض درجات الحرارة، كتير من الناس بيلاحظوا إنهم بيروحوا الحمام عدد مرات أكتر من الطبيعي، وبيحسوا برغبة متكررة في التبول حتى لو مش بيشربوا مياه كتير، فإيه السبب العلمي ورا الظاهرة دي؟ وهل في طرق تقدر تقلل بيها من المشكلة دي؟
السبب العلمي ورا زيادة التبول في الشتاء
انقباض الأوعية الدموية
في الجو البارد، الجسم بيحاول يحافظ على درجة حرارته، فالأوعية الدموية بتنقبض عشان تقلل تدفق الدم للأطراف وتحافظ على الحرارة في الأعضاء الداخلية، الانقباض ده بيزود ضغط الدم، وبالتالي الكلى بتشتغل أكتر عشان تتخلص من السوائل الزايدة وتقلل الضغط، وده اللي بيخليك تحس إنك عايز تدخل الحمام كتير.
قلة التعرق
في الصيف، الجسم بيتخلص من السوائل الزايدة عن طريق العرق، لكن في الشتاء التعرق بيقل جدا، فبالتالي الكلى بتتكفل بإخراج السوائل دي عن طريق البول، وده بيخليك تزور الحمام أكتر من المعتاد.
زيادة نشاط الجهاز الباراسمبثاوي
في البرد، الجهاز العصبي الباراسمبثاوي بيشتغل أكتر عشان يهدئ الجسم، لكنه كمان بيحفز المثانة على الانقباض، وده اللي بيزود الشعور بالحاجة للتبول.
إزاي تقلل من المشكلة دي؟
- حافظ على تدفئة جسمك، لأن البرد هو السبب الرئيسي، فكل ما كنت دافي، كل ما قل التأثير ده.
- قلل من المشروبات المدرة للبول زي القهوة والشاي، لأن الكافيين بيزود الحاجة للتبول.
- اشرب المياه بشكل منتظم، لكن متشربش كميات كبيرة مرة واحدة، عشان متحفزش الكلى إنها تخرج السوائل بسرعة.
- مارس الرياضة الخفيفة، لأنها بتساعد على تنشيط الدورة الدموية وتوزيع السوائل في الجسم بطريقة متوازنة