زيت الزيتون من أهم الزيوت اللي بنستخدمها يوميا، سواء في الطهي أو العناية بالبشرة والشعر، لكن للأسف السوق مليان بأنواع مغشوشة ممكن تكون مضرة للصحة، بعض التجار بيخلطوا زيت الزيتون بزيوت رديئة أو مواد تانية تقلل جودته، وده بيخلي المستهلك يدفع فلوسه في منتج مش نقي، علشان كده، مهم جدا تعرف إزاي تكتشف زيت الزيتون المغشوش بسهولة وتحمي نفسك وأسرتك من الغش التجاري.
إزاي تفرق بين زيت الزيتون الأصلي والمغشوش؟
1. اختبار التجميد في التلاجة
- واحدة من أسهل الطرق لاختبار زيت الزيتون هي وضع زجاجة صغيرة منه في الفريزر لمدة ساعتين.
- لو بدأ يتجمد ويبقى قوامه سميك مع وجود بعض التكتلات البيضاء، فده دليل على إنه زيت زيتون نقي.
- لو فضل سائل تماما أو تجمد بشكل متماسك زي الزيوت النباتية العادية، فغالبا الزيت مخلوط بزيوت تانية.
2. اختبار الطعم والرائحة
- زيت الزيتون الأصلي ليه رائحة قوية وطعم مميز، وأحيانا يكون فيه نكهة لاذعة شوية أو مرارة خفيفة، وده دليل على جودته، لو كان طعمه خفيف جدا ومافيهوش أي نكهة، أو ريحته ضعيفة، فده معناه إنه مش نقي أو تم تخفيفه بزيوت تانية.
3. اختبار اللون واللزوجة
- زيت الزيتون الأصلي بيكون لونه أخضر أو ذهبي حسب نوع الزيتون ووقت عصره.
- الزيت المغشوش بيكون شفاف أو فاتح جدا، وأحيانا بيكون قوامه خفيف زي الزيت العادي.
4. اختبار الماء والصابون
- حط نقطة صغيرة من زيت الزيتون في كوب ماء بارد.
- لو الزيت فضل منفصل على شكل بقع واضحة وما اختلطش بالمياه، فده دليل على إنه نقي.
- لو بدأ يختلط بالمياه بسرعة أو اتغير لونه جوه الكوب، فغالبا فيه إضافات تانية.
دلوقتي بعد ما عرفت الطرق البسيطة دي، مش هيضحك عليك حد تاني لما تشتري زيت الزيتون! جرب الاختبارات دي بنفسك، وتأكد إن الزيت اللي بتستخدمه نقي ومفيد لصحتك وصحة أسرتك.