في زمن التكنولوجيا، بقى من السهل جدا إن حسابات التواصل الاجتماعي تتعرض للاختراق، وواتساب واحد من التطبيقات اللي ممكن يكون هدف للمخترقين عشان يراقبوا محادثاتك ويتجسسوا عليك بدون ما تاخد بالك، المشكلة إن أغلب الناس مش بتلاحظ العلامات اللي بتقول إن حسابها مش آمن، وده ممكن يعرض خصوصيتهم لخطر كبير. في المقال ده، هتعرف أهم الإشارات اللي بتقول إن حسابك على واتساب مخترق، وإزاي تحمي نفسك من التجسس.
إزاي تعرف إن حسابك على واتساب مخترق؟
1. رسائل مقروءة بدون ما تفتحها
لو لاحظت إن في رسائل عندك مقروءة رغم إنك متأكد إنك مافتحتهوشا، فده مؤشر إن في حد تاني داخل على حسابك.
2. بطء التطبيق بشكل ملحوظ
لو واتساب بقى بطيء جدا فجأة، أو بيهنج باستمرار، فممكن يكون في برنامج تجسس شغال في الخلفية وبينقل بياناتك لحد تاني.
3. ظهور أجهزة غريبة في الأجهزة المرتبطة
واتساب بيوفر ميزة “الأجهزة المرتبطة” اللي بتسمح لك تعرف الأجهزة اللي بتستخدم حسابك، لو لقيت جهاز غريب مش بتاعك، فده معناه إن حد اخترق حسابك.
4. إرسال رسائل من حسابك بدون علمك
لو أصحابك بيقولوا إنك بعتلهم رسائل أو لينكات وانت متأكد إنك مافعلتش ده، فده دليل على إن في حد بيستخدم حسابك.
5. خروج متكرر من الحساب
لو لاحظت إن واتساب بيطلب منك تسجيل الدخول من جديد كل شوية، فممكن يكون حد بيحاول يستخدم حسابك من جهاز تاني.
إزاي تحمي نفسك من الاختراق؟
- افحص الأجهزة المرتبطة بحسابك من خلال إعدادات واتساب، واحذف أي جهاز غريب.
- فعل التحقق بخطوتين عشان تمنع أي حد من الدخول لحسابك حتى لو معاه رقمك.
- متضغطش على أي روابط مشبوهة جاية لك من مصادر غير معروفة.
نزل تطبيقاتك من المصادر الرسمية بس ومتستخدمش تطبيقات واتساب المعدلة لأنها بتكون مليانة ثغرات أمنية.