الباذنجان المخلل واحد من أشهر المقبلات اللي بيحبها الكل، خصوصًا مع السندوتشات السريعة زي الكبدة والسجق، بس السر في نجاحه مش بس في التخليل، لكن في القرمشة والطعم الحادق اللي بيخليه أحلى من أي مخلل جاهز، لو نفسك تعمليه في البيت بنفس جودة المحلات، يبقى لازم تتبعي الطريقة الصح اللي هتضمنلك باذنجان مقرمش، متماسك، وطعمه رهيب.
أسرار نجاح الباذنجان المخلل
1- اختيار نوع الباذنجان المناسب
اختاري الباذنجان الأسود الصغير الرفيع، لأنه بيكون أقل بذور وطعمه مش مر، وبيتشرب التتبيلة بسرعة.
2- السلق بطريقة صحيحة
الباذنجان لازم يتسلق نص سلقة بس، يعني يكون طري من جوه بس لسه محتفظ بشكله وما يكونش مهري.
3- التتبيلة الغنية بالنكهة
التتبيلة هي اللي بتدي الطعم الرهيب، وبتتكون من خل، ثوم، لمون، شطة، وكمون، مع زيت غزير عشان يحفظه فترة أطول.
4- التخزين الصح للحفاظ على القرمشة
الباذنجان لازم يتصفى كويس جدًا من المياه بعد السلق، ويتحط في برطمانات زجاج محكمة الغلق، عشان يحافظ على قرمشته ونكهته.
طريقة عمل الباذنجان المخلل زي المحلات
المكونات
- نصف كيلو باذنجان عروس صغير
- 4 فصوص ثوم مهروس
- 2 ملعقة كبيرة خل أبيض
- عصير ليمونة كبيرة
- 2 ملعقة صغيرة كمون
- 1 ملعقة صغيرة شطة (اختياري)
- 1 ملعقة صغيرة ملح
- 3 ملاعق كبيرة زيت نباتي
- نصف كوب ماء التخليل (ماء+خل+ملح)
طريقة التحضير
- سلق الباذنجان: اسلقيه في مياه مغلية مع شوية ملح لمدة 5 دقايق بس، بعدين صفيه فورًا وسيبيه يبرد تمامًا.
- تحضير التتبيلة: اخلطي الثوم المهروس مع الكمون، الشطة، الملح، الخل، عصير الليمون، والزيت.
- حشو الباذنجان: افتحي الباذنجان من المنتصف واحشيه بالتتبيلة كويس، وبعدها رصيه في البرطمان.
- التخليل: صبي عليه خليط المياه والخل لحد ما يتغطى تمامًا، وسيبيه يومين على الأقل قبل التقديم.