في الوقت اللي بقى فيه واتساب جزء أساسي من حياتنا اليومية، انتشرت تحذيرات عن اختراق الحسابات والتجسس على المستخدمين بدون ما يحسوا. ولو لاحظت بعض العلامات الغريبة على تطبيقك، فده معناه إنك متراقب وحد عنده وصول لمحادثاتك ومعلوماتك الشخصية!
إزاي تعرف إنك متراقب على واتساب
- نفاد البطارية بسرعة غريبة: لو لاحظت إن بطارية موبايلك بتخلص أسرع من المعتاد، ممكن يكون فيه تطبيق تجسس بيشتغل في الخلفية، خاصة لو كنت بتستخدم واتساب بشكل عادي.
- ارتفاع درجة حرارة الهاتف بدون سبب: لو موبايلك بيسخن حتى وأنت مش بتستخدمه، فده ممكن يكون دليل على وجود تطبيق بيتجسس عليك في الخلفية، وده بيستهلك طاقة الجهاز.
- ظهور رسائل “مقروءة” وأنت ما فتحتهاش: لو شفت رسائل عندك اتحولت لعلامتين صح زرق بدون ما تفتحها، أو لقيت محادثات مفتوحة وأنت متأكد إنك ما لمستهاش، فده معناه إن حد تاني بيستخدم حسابك.
- خروجك من الحساب بشكل مفاجئ: لو لقيت واتساب بيطلب منك تسجيل الدخول فجأة، فده احتمال كبير إن حد دخل بحسابك على جهاز تاني.
ازاي تحمي نفسك
- فعل التحقق بخطوتين من إعدادات واتساب.
- راجع الأجهزة المرتبطة بحسابك واحذف أي جهاز غريب.
- ما تضغطش على روابط مشبوهة أو تحمل ملفات من مصادر غير معروفة.
- استخدم تطبيقات الحماية لفحص موبايلك من أي برامج تجسس.
خليك واعي وما تستهونش، لأن التجسس ممكن يكشف أسرارك ويسبب لك مشاكل كبيرة.