مرضى السكر لازم يكونوا حذرين أثناء الصيام، لأن انخفاض أو ارتفاع السكر بشكل مفاجئ ممكن يؤدي لغيبوبة. علشان كده، مهم جدا تراقب جسمك وتاخد بالك من العلامات اللي بتنذرك قبل ما تحصل أي مضاعفات.
أول إشارات الخطر اللي لازم تلاحظها
لو حسيت بدوخة، تعب شديد، رعشة في الجسم، أو عرق بارد، ده ممكن يكون إنذار بانخفاض السكر في الدم، لو سبت الموضوع بدون تدخل، ممكن تفقد وعيك وتدخل في غيبوبة. كمان، لو بدأ يظهر صداع شديد، عطش مستمر، أو تشوش في الرؤية، فده معناه إن مستوى السكر عالي جدا.
ازاي تتصرف بسرعة قبل فوات الأوان؟
لو حسيت بأي من الأعراض دي، لازم تفطر فورا وتاخد حاجة ترفع السكر بسرعة زي تمرة أو عصير، أما لو الأعراض بسبب ارتفاع السكر، لازم تشرب مية كتير وتاخد الأدوية الخاصة بيك بعد استشارة الدكتور.
نصائح مهمة لمرضى السكر في الصيام
- افطر على تمر ومية، وبعدها وجبة متوازنة.
- تجنب السكريات الكثيرة في السحور عشان السكر ما يعلاش فجأة.
- راقب مستويات السكر يوميا بمقياس السكر المنزلي.
- لو حسيت بأي عرض خطير، متتأخرش في الإفطار.
- متجاهلش الأعراض دي، لأن التصرف السريع ممكن ينقذك من خطر كبير ويحافظ على صحتك أثناء الصيام.
الصيام لمرضى السكر لازم يكون تحت إشراف طبي، لأن كل جسم بيختلف عن التاني، لو كنت بتاخد أنسولين، لازم تتابع نسبة السكر بانتظام، حاول تمارس نشاط خفيف بعد الإفطار وتحافظ على نظام غذائي متوازن علشان تتجنب أي مضاعفات خلال اليوم.