الكوسا من الخضروات المفيدة والمليئة بالفيتامينات، وبتتهضم بسهولة، عشان كده ناس كتير بتعتبرها اختيار مثالي للأطفال والمرضى، لكن اللي ممكن متكونش عارفه هو إن بعض أنواع الكوسا ممكن تحتوي على سموم خطيرة تحت ظروف معينة، وده ممكن يكون خطر على صحتك، في المقال ده هنعرفك على سبب وجود السموم دي في الكوسا، وإزاي تتجنبها عشان تحافظ على صحتك وصحة عيلتك.
إزاي ممكن تكون الكوسا سامة؟
الكوسا بتنتمي لعيلة القرعيات، واللي بتفرز مركب اسمه الكوكربيتاسين، وهو مادة سامة بتحمي النبات من الحشرات، في العادي، المستويات بتكون منخفضة بسبب التهجين الزراعي، لكن أحيانًا بتزيد النسبة دي بشكل غير طبيعي، وده اللي بيخلي الكوسا خطيرة لو اتكلت، خصوصًا لو كان طعمها مر، والأسوأ من كده إن السم ده مابيختفيش حتى بعد الطبخ.
إزاي تحمي نفسك من الكوسا السامة؟
- جرب قطعة صغيرة من الكوسا قبل الطبخ، ولو حسيت إنها مرة، تخلص منها فورًا.
- اشتري الكوسا من أماكن موثوقة عشان تضمن جودتها.
لو بتزرعها في البيت، خد بالك إنها ممكن تتلوث بالسم لو كانت قريبة من نباتات قرعية برية.
زراعة الكوسا في البيت هل هي آمنه؟
الدراسات بتقول إن زراعة الكوسا في الحدائق المنزلية ممكن تزود خطر احتوائها على الكوكربيتاسين، خاصة لو كانت بتنمو جنب نباتات قرعية برية، عشان كده لازم تتأكد من طعمها قبل ما تستخدمها في الأكل.
في النهاية، الكوسا فوايدها كتير، لكن لازم تكون حذر من احتمالية احتوائها على السموم، خد بالك من الطعم، واهتم بجودة اللي بتاكله، عشان تحمي نفسك وعيلتك من أي مخاطر صحية.