الصيام ليه فوائد صحية كتير، لكنه ممكن يشكل خطر على مرضى السكري لو مش واخدين بالهم من علامات انخفاض أو ارتفاع السكر في الدم، المشكلة إن بعض الأعراض بتبدأ بسيطة، لكن لو تم إهمالها، ممكن تؤدي لغيبوبة السكر اللي تعتبر حالة طبية طارئة، علشان كده، مهم جدًا إنك تراقب جسمك خلال ساعات الصيام وتعرف العلامات اللي لو ظهرت، لازم تتصرف فورًا وتحمي نفسك من أي مضاعفات خطيرة.
إيه هي غيبوبة السكر وليه بتحصل؟
- غيبوبة السكر بتحصل لما مستوى السكر في الدم يوصل لمعدل غير طبيعي جدًا، سواء كان منخفض أو مرتفع.
- السكر المنخفض جدًا (Hypoglycemia): بيحصل لما نسبة السكر في الدم تقل عن 70 مجم/ديسيلتر، وده ممكن يؤدي لفقدان الوعي لو متعالجش بسرعة.
- السكر المرتفع جدًا (Hyperglycemia): لو السكر زاد عن 300 مجم/ديسيلتر، ممكن يسبب غيبوبة بسبب تراكم الأحماض في الدم.
علامات انخفاض السكر اللي لو ظهرت لازم تتصرف فورا
- دوخة وعدم تركيز: لو بدأت تحس إنك مش قادر تركز أو الدنيا بتلف بيك، ده ممكن يكون مؤشر على انخفاض السكر.
- رعشة في الجسم وتعرق شديد: الجسم بيحاول يرفع السكر عن طريق إفراز الأدرينالين، وده بيخليك تحس برجفة وتعرق مفاجئ.
- جوع شديد وعصبية: الإحساس بجوع شديد رغم إنك صايم، مع إحساس بالعصبية أو توتر غير مبرر.
- خفقان القلب وسرعة ضرباته: انخفاض السكر بيأثر على القلب وبيخليه يدق بسرعة غير طبيعية.
- ضعف في الرؤية أو زغللة: أي مشكلة في النظر أثناء الصيام ممكن تكون علامة إن السكر نازل جدًا.
- علامات ارتفاع السكر اللي ممكن توصلك لحالة خطيرة
- عطش شديد وجفاف في الفم: حتى لو كنت صايم، إحساسك الدائم بالعطش ممكن يكون مؤشر على ارتفاع السكر.
- كثرة التبول: لو لقيت نفسك محتاج تدخل الحمام كتير بعد الفطار، ممكن يكون السكر عندك مرتفع.
- إرهاق شديد وضعف عام: السكر العالي بيأثر على الطاقة وبيخليك تحس إن جسمك تقيل ومرهق جدًا.
- رائحة نفس غير طبيعية: لو حسيت إن نفسك بقى ريحته قريبة من الفواكه أو الأسيتون، ده ممكن يكون مؤشر على الحماض الكيتوني السكري، وده خطر جدًا.
- ألم في البطن وغثيان: ارتفاع السكر الشديد ممكن يخلي الشخص يحس بألم في المعدة مع شعور بالغثيان أو القيء.