البرص أو الوزغ واحد من الكائنات اللي أغلب الناس بتكرهها، وأول ما يشوفوه في البيت بيجروا على الشبشب عشان يخلصوا منه، لكن هل فكرت قبل كده إن قتله ممكن يكون ليه تأثير سلبي عليك وعلى بيتك؟ علماء البيئة وخبراء الصحة حذروا من عادة التخلص من البرص، والسبب هيفاجئك!
ليه قتل البرص غلط وممكن يضرك؟
البرص مش مجرد كائن مزعج، لكنه بيقوم بدور مهم جدا في التوازن البيئي داخل البيت، من غير ما تحس، هو بيشتغل كـ”صياد طبيعي” للآفات الضارة زي البعوض والصراصير، بمعنى تاني، لما تقتل البرص، انت بتفتح الباب لانتشار الحشرات اللي ممكن تكون أخطر على صحتك.
مفاجأة غير متوقعة .. البرص وعلاقته بالثعابين!
الغريب في الموضوع إن قتل البرص ممكن يجذب الثعابين لبيتك! ازاي؟ ببساطة، الثعابين بتتغذى على الأبراص، ولما عدد الأبراص يقل، بتبدأ الثعابين تدور على أماكن جديدة تلاقي فيها أكل، وده ممكن يخليها تدخل البيوت بحثا عن غذائها المفقود، يعني بدل ما كنت بتواجه برص صغير، ممكن تلاقي نفسك قدام ضيف غير مرغوب فيه وأخطر بكتير!
الحل الأمثل للتعامل مع البرص في البيت
بدل ما تموته، جرب تطرده بطريقة آمنة. استخدم قشور البيض عشان تخوفه، لأن الأبراص بتعتقد إنها إشارة لوجود طيور مفترسة، كمان، رش خل أو فلفل أسود في الأماكن اللي بيظهر فيها، وهتلاقيه اختفى من غير ما تضطر تقتله.
الموضوع مش مجرد خرافة، لكنه حقيقة علمية هتغير طريقة تعاملك مع البرص للأبد، فكر مرتين قبل ما تمد إيدك عليه، لأنك ممكن تخسر أكتر مما تتخيل!