كتير من الناس بيحبوا شكل المطبخ الخشبي لأنه بيدي لمسة فخمة ودافية للمكان، بس مع الطبخ اليومي والحرارة والدهون، بيبدأ يتأثر ويبان عليه التعب، المشكلة إنك لو استخدمت منظفات قوية، ممكن تبوّظ لونه أو لمعانه، علشان كده، لازم نكون أذكى ونختار طريقة تنظيف تحافظ على الخشب وفي نفس الوقت تشيل الدهون بكل سهولة.
أخطر غلط ممكن تعمله مع الخشب
الناس ساعات بتفتكر إن أي منظف ممكن ينفع، لكن الحقيقة إن الخشب حساس، خصوصًا قدام المواد الكيميائية اللي ممكن تعمل فيه بقع أو حتى تشققات مع الوقت، كمان لما الدهون تفضل متراكمة، بتبقى إزالتها شبه مستحيلة من غير ما تتأذى الخزائن.
الحل السحري: خل أبيض من دولاب مطبخك
الخل الأبيض يعتبر من أنضف الحلول الطبيعية، بيشيل الدهون وبيطهر السطح من غير ما يسيب أي أثر ضار، جرب تخلط نص كباية خل أبيض مع كباية مية دافئة، ولو حبيت ريحة منعشة، حط شوية عصير ليمون، رش الخليط على الخشب، سيبه شوية، وامسحه بقماشة ناعمة هتشوف الفرق بعينك.
نصايح بسيطة تحافظ بيها على مطبخك
بعد ما تخلص التنظيف، متغرقش الخشب في الميه. كفاية تمسحه بخفة، وممكن كمان تستخدم نقطة صغيرة من زيت الزيتون علشان ترجعله لمعانه الطبيعي، ولو عملت كده كل أسبوع، هتلاقي المطبخ دايمًا نضيف ومن غير دهون.