البامية من الأكلات اللي ليها جمهور كبير في كل بيت مصري وعربي، وناس كتير بتحبها بأكتر من طريقة لكن في الوصفة دي، هنجرب مع بعض طريقة مختلفة وسهلة جدًا لعمل البامية في الخلاط، هتوفر وقت ومجهود وهتديكي نفس الطعم الجميل اللي متعودين عليه، ويمكن أحلى كمان تعالي نشوف الخطوات والمقادير بالتفصيل.
مكونات وصفة البامية في الخلاط
- نصف كيلو بامية مغسولة كويس
- 2 ملعقة كبيرة معجون صلصة
- 2 كوب عصير طماطم
- بصلة متوسطة مفرومة
- فص ثوم + ملعقة كبيرة ثوم مفروم
- ربع كوب زيت
- ملعقة صغيرة كمون
- ملعقة صغيرة فلفل أسود
- ملعقة صغيرة كزبرة ناشفة
- ملح حسب الرغبة
خطوات التحضير بالتفصيل
نبدأ بغسل البامية كويس وتصفيتها من الميّة، وبعدها نخلطها في الخلاط مع فص ثوم وكمية بسيطة من عصير الطماطم لما البامية تتفرم كويس، نبدأ في تشويحها على النار مع البصلة والزيت لحد ما تاخد لون ذهبي. بعد كده نضيف باقي عصير الطماطم والتوابل والملح ونسيبها تغلي.
في خطوة أخيرة، بنجهز الثوم المفروم مع الكزبرة ونشوحهم في زيت، وبعد كده نضيفهم على البامية ونقلب كويس نسيب البامية تستوي على نار هادية، وبعد ما تهدى شوية، نقدّمها مع عيش بلدي سخن.