الكفتة المشوية من الأكلات اللي ليها مكانة خاصة على السفرة، وناس كتير بتحبها خصوصًا لما تكون متسوّية على الفحم بطريقتها المميزة علشان كده، هنقدملك طريقة سهلة جدًا تعملي بيها كفتة زى كفتة الحاتي بالظبط، بنفس الطعم والرائحة، ومن غير ما تحتاجي تطلبيها من برّه كل اللي هتحتاجيه شوية مكونات بسيطة ومعروفة، وهنشرحلك خطوة بخطوة الطريقة.
مكونات كفتة الحاتي المشوية
- كيلو لحمة مفرومة
- 2 بصلة مفرومة (ومصفّاة كويس من المية)
- ملعقة صغيرة فلفل أسود
- ملعقة كبيرة توابل مشكلة
- ملعقة بابريكا
- 2 ملعقة بقسماط
- ملح حسب الرغبة
- ربع ملعقة حبهان مطحون
- ملعقة صغيرة كبابة صيني
- ملعقة كبيرة بقدونس مفروم
طريقة التحضير خطوة بخطوة
في وعاء عميق، ضيفي اللحمة مع البصل والتوابل والبقسماط وابدئي في العجن كويس جدًا لحد ما تحصلي على عجينة متماسكة بعد كده، غطيها وسيبيها في التلاجة ترتاح حوالي نص ساعة.
لما تطلعيها، شكلي الكفتة على أسياخ أو أعواد خشب، واعمليها بحجم متساوي علشان تستوي مظبوط سخني الجريل أو الطاسة أو حتى الفرن على 200 درجة، وابدئي في الشوي، وقلبيها لحد ما تاخد لون دهبي من كل الجوانب.
قدّمي الكفتة مع سلطة خضراء أو طحينة، ومعاها عيش أو أرز بسمتي، وهتاكلي أحلى كفتة زي اللي بتتعمل في المطاعم.