في وقت بقى فيه نمط الحياة الصحي هدف لناس كتير، بقى ضروري نلاقي وصفات تجمع بين الطعم الحلو والفوائد الغذائية، وده اللي بيقدمه السمك المقلي بدون زيت، الطريقة دي بتقلل كمية الدهون في الأكل من غير ما تأثر على الطراوة أو المذاق، وعلشان كده بقت خيار مثالي للي بيدوروا على أكلات خفيفة من غير ما يضحوا بالنكهة.
مكونات بسيطة لتحضير طبق صحي
لتحضير الوصفة دي هنحتاج 4 شرائح من السمك (بلطي أو بوري)، عصير ليمونة، 3 فصوص ثوم مفروم، معلقة صغيرة كمون، معلقة بابريكا، نص معلقة كزبرة ناشفة، رشة ملح وفلفل أسود، كمان بنحتاج معلقة دقيق ذرة و2 معلقة بقسماط علشان نغلف بيهم السمك ونديله قرمشة خفيفة من غير أي زيت.
خطوات التحضير بطريقة خفيفة ومفيدة
نبدأ بخلط التوابل مع عصير الليمون والثوم كويس جدًا ونتبل بيهم السمك، ونسيبه حوالي نص ساعة علشان يتشرب الطعم، بعد كده نغلف الشرائح بخليط دقيق الذرة والبقسماط، في طاسة غير لاصقة سخنة، نحط السمك على نار متوسطة ونقلبه مرة واحدة بس لحد ما لونه يبقى دهبي، لو حبيت، ممكن ترش نقطة صغيرة جدًا من زيت الزيتون بعد التسوية علشان لمعة بسيطة.
الفوائد الغذائية للسمك المقلي بدون زيت
الطريقة دي مش بس صحية، لكنها كمان بتحافظ على القيمة الغذائية العالية للسمك، وبتقلل من الدهون المشبعة اللي ممكن تضر الجسم، كمان السمك غني بأوميجا 3 المفيدة للقلب والمخ، وده بيخليه مناسب جدًا للأنظمة الغذائية والداي، ممكن يتقدم مع خضار سوتيه أو سلطة خضراء علشان يكون طبق متكامل ومشبع وخفيف في نفس الوقت.