رغم إن الشاي جزء أساسي من يومنا ومافيش بيت بيخلو منه، إلا إن في شوية عادات بنعملها من غير ما ناخد بالنا ممكن تخلّي الشاي بدل ما يكون مفيد، يتحوّل لحاجة ضارة لصحتنا تفاصيل صغيرة زي طريقة التحضير أو نوع الشاي اللي بنستخدمه، بتفرق كتير في تأثيره على الجسم، وده اللي محتاجين ننتبه له علشان نحافظ على صحتنا من غير ما نمنع نفسنا من مشروبنا المفضل.
الفلوريد الخفي وتأثيره على العظام
بعض أنواع الشاي، خصوصًا الرخيصة أو اللي مش معروفة، بتحتوي على نسبة عالية من الفلوريد المادة دي بتتراكم في الجسم وبتأثر على العظام والأسنان، ومع الاستمرار ممكن تسبب هشاشة ومشاكل صحية مزمنة.
غلي الشاي لفترة طويلة بيضر أكتر ما بيفيد
ناس كتير بتغلي الشاي وقت طويل جدًا، وده بيخلّي مكونات زي “التانينات” تزيد، ودي مواد بتمنع امتصاص الحديد من الجسم، وده ممكن يؤدي لضعف عام أو حتى فقر دم.
السكر الكتير يخلي الشاي خطر صامت
إضافة كميات كبيرة من السكر للشاي بيحوله من مشروب مفيد لمصدر خطر بيزود فرص الإصابة بالسمنة والسكري، وبيضغط على الجسم بشكل كبير.
توقيت شرب الشاي مهم
شرب الشاي مباشرة بعد الأكل بيمنع امتصاص الحديد من الوجبة، وده بيأثر على صحتك على المدى الطويل، خصوصًا لو كنت بتعتمد عليه بشكل يومي.
اختيار نوع الشاي بيحمي صحتك
فيه أنواع من أكياس الشاي بتتفاعل مع الحرارة وبتطلق مواد مضرة، وده بيحصل من غير ما نحس علشان كده، دايمًا اشتري شاي من مصدر موثوق.
نصايح علشان تشرب شاي بأمان
– اختار شاي طبيعي من مصدر مضمون
– قلّل السكر أو استبدله ببدائل صحية
– متغليش الشاي على النار
– ابعد عن شربه بعد الأكل مباشرة