بطاقة الرقم القومي ليست فقط وسيلة تعريف رسمية، لكنها مفتاح الحصول على جميع الخدمات الحكومية في مصر، من التعليم والصحة إلى المعاملات البنكية والعقود الرسمية علشان كده، القانون المصري شدد على قواعد واضحة لاستخدامها، وحدد عقوبات صارمة لأي تجاوزات أو تأخير في الإجراءات الخاصة بها.
1. التأخير في استخراج البطاقة بعد سن 16
القانون المصري بيلزم كل مواطن يبلغ 16 سنة باستخراج بطاقة الرقم القومي فورًا وأي تأخير بيُعتبر مخالفة يُعاقب عليها بغرامة مالية، وغالبًا بتبدأ من 100 جنيه. فـ لو أولادك أو إخواتك قربوا على السن ده، أنصحك تجهزوا الورق من بدري علشان تتفادوا الغرامة.
2. تجاهل تجديد البطاقة بعد 7 سنوات
بطاقتك مدتها 7 سنين من تاريخ إصدارها، ولازم تجددها مباشرة أول ما تنتهي. إهمال التجديد ممكن يمنعك من إجراء معاملات رسمية أو حتى التقديم على وظيفة، وبيعرّضك لغرامة تصل لـ 100 جنيه.
3. تقديم بيانات غير صحيحة
لو قدمت معلومات خاطئة زي مهنة غير حقيقية أو عنوان غير دقيق، القانون بيشوف ده “تزوير”. والمخالفات دي مش بس فيها غرامة، لكن في حالات معينة ممكن توصل للحبس، خاصة لو التزوير كان متعمد أو له تبعات قانونية خطيرة.
4. استخدام بطاقة مزورة أو منتهية الصلاحية
التعامل ببطاقة مزورة أو منتهية في جهة رسمية مش بس مخالفة، دي جريمة جنائية، وممكن تتحبس بسببها لمدة 6 شهور أو تدفع غرامة 500 جنيه، أو الاثنين مع بعض حسب الحالة.
نصائح لتجنب المشاكل
-
استخرج بطاقتك فور بلوغ 16 سنة
-
جددها قبل انتهاء مدتها
-
راجع بياناتك كويس قبل ما تستلمها
-
ابعد عن البطاقات المزورة أو أي تعامل غير رسمي