لو عايز تنبسط في العيد بدون ما تصرف كتير، القاهرة مليانة أماكن خروجات بأسعار رمزية جدًا ممكن تبدأ من 10 جنيه بس زي حديقة الأزهر، الحديقة الدولية، وحديقة الفسطاط الأماكن دي مش بس رخيصة لكنها مليانة أنشطة تناسب العائلات والأطفال، تقدر تتمشى، تستمتع بالمناظر الطبيعية، وتاخد صور حلوة.
أماكن ساحلية ليوم ممتع على البحر
لو نفسك في خروجة على البحر بدون تكلفة عالية، مش لازم تسافر بعيد، لأن شاطئ المعمورة في الإسكندرية أو رأس البر وبلطيم أماكن مثالية بأسعار رمزية ممكن تدخل الشاطئ بـ أقل من 20 جنيه وتستمتع بيوم كامل وسط المياه والرمال.
أماكن تراثية لمحبي الأصالة والتاريخ
لو بتحب الأماكن اللي فيها طابع ثقافي مميز، ممكن تزور شارع المعز والحسين وتمشي وسط المباني القديمة والأسواق الشعبية كمان القاهرة الفاطمية فيها أماكن رائعة زي بيت السحيمي وسبيل أم عباس، والأجمل إن التجول في الشوارع دي مجاني تمامًا.
أماكن ترفيهية ممتعة للأطفال بأسعار معقولة
لو معاك أطفال وعايز مكان مناسب للعب والمرح، ممكن تزور دريم بارك أو كيدزانيا أو ملاهي السندباد بأسعار تبدأ من 50 جنيه، كمان الحدائق العامة وأماكن الألعاب المجانية هتكون اختيار مثالي لقضاء وقت ممتع بدون تكلفة عالية.
العيد مش لازم يكون مكلف عشان تستمتع
مش لازم تصرف كتير عشان تنبسط في العيد، مصر مليانة أماكن خروجات رائعة بأسعار رمزية جدًا، اختار اللي يناسبك واستعد لأحلى عيد مع العيلة والأصحاب.