في كل مرة بنركب فيها طيارة، خصوصًا أول مرة، بيجي في بالنا سؤال بسيط لكنه محير جدًا، “ليه ما فيش مظلات تحت كل كرسي زي ما بنلاقي سترات النجاة؟”، ودايمًا الإجابة بتكون غامضة أو مش واضحة كفاية، ولكن في الحقيقة، الموضوع أعمق وأغرب من مجرد تكلفة أو إهمال، فيه أسباب تقنية وعلمية خلت فكرة وجود مظلات للركاب في الطيارات التجارية تكون مستحيلة، أو على الأقل غير منطقية.
الارتفاع الشاهق والتجهيزات المطلوبة
أغلب الطيارات التجارية بتطير على ارتفاعات بتوصل لـ 35 ألف قدم أو أكثر، والارتفاع دا مش آمن أبدًا للقفز بالمظلات بدون تجهيزات خاصة، والجسم البشري ما يقدرش يتنفس بشكل طبيعي في الجو دا، ولا يتحمل درجات الحرارة المنخفضة جدًا اللي بتوصل لتحت الصفر، وده غير إن القفز من الطيارة على السرعة والارتفاع دا ممكن يؤدي لفقدان الوعي أو الإصابة الخطيرة، والركاب العاديين مش مدربين على استخدام المظلات، وعلشان دا يحصل، هيحتاجوا تدريب خاص زي اللي بياخده المظليين المحترفين.
فتح أبواب الطيارة خطر قاتل
في خرافة منتشرة إنك ممكن تفتح باب الطيارة وتنط وقت الخطر، لكن الحقيقة إن الطيارات مضغوطة من جوه، وفتح الباب وهي في الجو شبه مستحيل، ولو حصل، هيكون فيه تفريغ ضغط مفاجئ ممكن يسبب كارثة لكل الركاب، ده غير إن التصميم الداخلي للطيارة مش معمول علشان يسمح بالقفز من الأبواب أصلاً، فدي مخاطرة ما تنفعش تتحسب ضمن خطط النجاة.
السلامة الجوية بتعتمد على الوقاية مش القفز
أغلب أنظمة الأمان في الطيران مبنية على الوقاية ومنع الحوادث من الأساس، مش التعامل معاها بعد ما تحصل، ومن أول الصيانة الدقيقة، لتدريب الطاقم، لنظام الملاحة والرصد الجوي، كلها وسائل تمنع الكارثة من البداية، وعلشان كده، المظلات مش جزء من الخطة، لأن الوقاية أهم بكتير من رد الفعل.