السرطان من أخطر الأمراض اللي ممكن تصيب الإنسان ومع كده ناس كتير بتتجاهل أعراضه في بدايتها لحد ما يفوت الأوان ممكن أعراض بسيطة زي تعب أو فقدان وزن تمر مرور الكرام ولكن الحقيقة إن الجسم بيدي إشارات واضحة وإحنا لازم نسمع له ، وفي المقال ده هنتكلم عن أخطر الأعراض اللي ممكن تكون مؤشر للإصابة بالسرطان وهنتعرف على إزاي تتصرف لما تحس بيها علشان متقولش بعدين “معرفتش”.
أخطر الأعراض اللي تدل على الإصابة بالسرطان
اليكم بعض أخطر الاعراض اللى تدل على الإصابة بالسرطان وهى:
- فقدان الوزن بدون سبب : لو بدأت تخس بسرعة من غير دايت أو رياضة وخد بالك ده ممكن يكون عرض مبكر لأنواع زي سرطان البنكرياس والمعدة أو الرئة والجسم وقتها بيستهلك طاقة بشكل غير طبيعي علشان يحارب الورم وده بيأثر على الوزن.
- الشعور بإرهاق مستمر : الإرهاق اللي مش بيروح حتى بعد النوم والراحة ممكن يكون من أعراض السرطان وخصوصًا سرطان الدم أو القولون والخلايا السرطانية ممكن تستهلك طاقة الجسم أو تؤثر على إنتاج خلايا الدم.
- أي تغيير في الجلد : شامات بتكبر وبقع لونها غريب أو جرح مش بيخف؟ دي علامات محتاجة فحص وممكن تكون بداية سرطان الجلد ، كمان الحكة الشديدة أو التصبغات المفاجئة ممكن تكون إشارات لأورام في الكبد أو الجهاز اللمفاوي.
- كحة أو بحة في الصوت : كحة مستمرة خاصة لو مصحوبة بدم أو تغير في الصوت لمدة طويلة ممكن تشير لسرطان الرئة أو الحنجرة ولو استمر الوضع أكتر من أسبوعين ولازم تروح لطبيب متخصص.
- نزيف مش طبيعي : نزيف من الأنف واللثة أو وجود دم في البول أو البراز ممكن يكون مؤشر على سرطان في الجهاز الهضمي أو المثانة أو الرحم والكشف المبكر ممكن يفرق في التشخيص والعلاج.
- كتل أو تورمات تحت الجلد : ظهور كتلة جديدة في الجسم خصوصًا في الثدي والرقبة وتحت الإبط أو الخصيتين لازم يتشاف حتى لو الكتلة مش بتوجع ولازم تتفحص بجهاز الأشعة أو تعمل تحاليل للتأكد.
- صعوبة في البلع أو الهضم : صعوبة البلع أو عسر الهضم المستمر ممكن يكون عرض لسرطان المريء أو المعدة وما تستناش لحد ما الأعراض تزيد واعرض نفسك على دكتور مختص في الجهاز الهضمي.
- التغيرات في التبول أو التبرز مش دايمًا بسيطة : لو بقيت تدخل الحمام أكتر أو بتحس بألم أو لاحظت تغيير في لون أو شكل البراز ده ممكن يكون إنذار بسرطان القولون أو المثانة.
إزاي تتصرف لما تلاحظ الأعراض دي
التصرف الصحيح في الوقت الصح ممكن ينقذ حياتك وهى:
- متهملش الأعراض أبدًا حتى لو حسيت إنها بسيطة.
- روح لطبيب فورًا واعمل الفحوصات المطلوبة زي تحليل دم وأشعة أو خزعة.
- تابع صحتك بانتظام وخلّي عندك ملف طبي تقدر تراجعه في أي وقت.
- عيش حياة صحية: كل كويس والعب رياضة وابعد عن التدخين والملوثات.
- الفحص الدوري مهم جدًا خاصة لو فيه تاريخ مرضي في العيلة.
- التطعيمات الوقائية زي لقاح HPV أو لقاح الكبد ممكن يقللوا فرص الإصابة ببعض الأنواع.
- التقليل من التعرض للمواد المسرطنة في الأكل أو البيئة مهم جدًا لحماية صحتك.