يمكن كتير مننا شاف فيديوهات لقطط بتقفز فجأة أو تهرب بسرعة لما تلاحظ وجود خيارة وراها، وافتكرنا إن ده مجرد هزار أو مبالغة، ولكن الحقيقة إن رد فعل القطط مش تمثيل، بل نابع من غريزة قوية مرتبطة بالبقاء، القطط كائنات شديدة الانتباه لما يحيط بيها، وأي جسم غريب بيظهر فجأة وراها، خصوصًا وهي بتاكل أو مسترخية، بيخليها تترعب، الشكل والطول ولون الخيار بيشبه في عقل القط الثعبان، وده بيخلي دماغها تدق جرس الإنذار فورًا.
التفسير العلمي مش الخيارة بذاتها لكن المفاجأة
العلماء وضحوا إن اللي بيخوف القطط مش الخيار نفسه، ولكن ظهوره المفاجئ في بيئة تعتبرها القطط آمنة، لما القط بيلاقي جسم غريب ورا ظهره من غير ما يحس بيه، بيربط ده بالتهديد أو الخطر، بعض الباحثين شافوا إن شكل الخيار له دور فعلاً، لأنه بيشبه الثعابين، عدو طبيعي لمعظم القطط، لكن الأهم من ده إن المفاجأة دي بتحصل في مكان الأكل، وده بيكسر إحساس القط بالأمان، وبيخليه يتصرف برد فعل عنيف لحماية نفسه.
تحذير مهم ليه ماينفعش نهزر مع القطط كده؟
رغم إن الفيديوهات دي ممكن تبان مضحكة، الحقيقة إن إخافة القطط بالطريقة دي ممكن تسبب ليها توتر شديد وضرر نفسي، والقطط ممكن تربط مكان الأكل بالخوف، وتتجنب الأكل بعد كده، كمان التوتر المفاجئ ممكن يؤدي إلى مشاكل صحية، خاصة للقطط الكبيرة أو المريضة، لذلك، العلماء وأطباء البيطريين بينصحوا بشدة بعدم استخدام الخيار – أو أي شيء آخر – لتخويف القطط، حتى لو بغرض المزاح.