أكيد في مرة وانت راكب طيارة أو بتتفرج على فيلم عن الطيران، سألت نفسك، ليه مفيش مظلات للركاب زي الطيارين، والسؤال في ظاهره منطقي، لكن الحقيقة ورا غياب المظلات أغرب من أي تفسير بسيط، معظم الناس بتفترض إن وجود مظلات ممكن ينقذ الأرواح في حالة طارئة، لكن الواقع إن تنفيذ الفكرة دي في طيارة تجارية كبيرة فيه صعوبات علمية وفنية ضخمة.
أسباب علمية وتقنية وراء غياب المظلات
الطيارات التجارية بتطير على ارتفاعات شاهقة (حوالي 35 ألف قدم)، وفي الارتفاع ده، الأكسجين قليل جدًا، والجو بارد بشكل قاتل، لو حد قفز من الطيارة من الارتفاع ده، مش هيقدر يتنفس، وممكن يفقد وعيه خلال ثواني، كمان، سرعة الطيارة بتوصل لأكثر من 800 كم/ساعة، والقفز منها في الظروف دي ممكن يكون قاتل من اللحظة الأول، غير كده، مجرد فتح باب الطيارة في الجو نفسه خطر كبير على كل اللي فيها، وبيخليه شبه مستحيل.
السلامة في التصميم أولى من القفز
الطيارات مصممة أساسًا علشان ما يحصلش فيها طوارئ، وكل إجراءات السلامة موجهة لتفادي الحوادث من الأساس، مش للهروب منها، شركات الطيران بتستثمر ملايين في تدريب الطيارين، وأنظمة الملاحة، والصيانة الدقيقة، علشان تقلل فرص حدوث أي خلل، نسبة حوادث الطيارات أقل بكتير من أي وسيلة مواصلات تانية، وده السبب اللي بيخلي الاعتماد على السلامة الداخلية أهم بكتير من فكرة القفز بمظلة.