من أكتر الحاجات اللي بنحبها على السفرة هي البطاطس المحمرة، بس دايمًا بيكون في فرق كبير بين اللي بنعملها في البيت واللي بناكلها في المطاعم، وده بيخلينا نسأل، وهو إحنا بنغلط في إيه السؤال ده اتجاوب عليه أخيرًا من خلال شيف مشهور كشف السر الحقيقي اللي بيخلي البطاطس تطلع مقرمشة وذهبية زي ما بنحبها تمامًا، واللافت إن الطريقة كانت قدامنا من زمان، لكن يمكن ماكناش واخدين بالنا منها.
الخطوة الأولى: التحضير الصح للبطاطس
المشكلة مش في التحمير نفسه، لكن في التحضير اللي بيبدأ من أول ما تمسك البطاطس بإيدك، الشيف أكد إن السر الأساسي هو الاهتمام بكل خطوة في التجهيز، وده بيشمل:
- تقطيع البطاطس إلى شرائح متساوية في الحجم، عشان تستوي كلها في وقت واحد.
- نقع الشرائح في ماء بارد مع شوية خل أو ملح لمدة 30 دقيقة على الأقل، وده بيساعد على تفريغ النشا الزائد.
- بعد النقع، لازم تنشيف البطاطس كويس جدًا، لأن وجود المياه بيأثر على درجة حرارة الزيت وبيخليها تطرى بدل ما تتحمر.
الخطوة الثانية: القلي على مرحلتين
بعد ما تجهز البطاطس، تيجي مرحلة التحمير، وهنا بيكمن الفرق الحقيقي، والسر مش إنك تحطها في الزيت مرة واحدة، لكن إنك:
- تقلي البطاطس أول مرة على درجة حرارة متوسطة، وده عشان تستوي من جوه من غير ما تحترق.
- تسيبها تبرد شوية، وبعدين تقليها تاني على نار عالية عشان تاخد اللون الذهبي والقرمشة المطلوبة.
- تستخدم نوع زيت مناسب للقلي العميق، ويفضل تغييره بانتظام علشان الطعم ما يتغيرش.
بطاطس زي المطاعم من غير مجهود كبير
الجميل في الوصفة دي إنها مش معقدة، ومكوناتها موجودة في كل بيت، لكن اللي بيصنع الفرق هو التركيز على التفاصيل، كتير من الناس لما جربوا الطريقة، انبهروا بالنتيجة وقالوا إنهم كانوا بيغلطوا في حاجات بسيطة من غير ما يعرفوا، ولو جربت الطريقة دي مرة، هتحس إنك بتاكل بطاطس مطاعم في بيتك، وساعتها هتفهم إن السر الحقيقي مش في المكونات، لكن في إزاي بتستخدمها.