طول عمرنا بنتعامل مع نواة التمر على إنها مجرد بواقي لازم تتخلص منها، لكن المفاجأة إنها في الحقيقة كنز طبيعي مهمل موجود في كل بيت، ومع ذلك قليل جدًا اللي يعرف قيمته، سواء للبشرة أو الشعر أو حتى في الزراعة، تخيلي إنك طول السنين دي كنتي بترمي حاجة ممكن تغير روتين جمالك بالكامل، وتفيد صحتك، وتساعدك كمان في زراعة نباتات صحية في البيت.
نواة التمر للبشرة والشعر سر الجمال اللي محدش بيحكي عنه
اللي ما تعرفهوش إن نواة التمر غنية بمضادات الأكسدة، والأحماض الدهنية، والعناصر اللي بتغذي الجلد والشعر بعمق، ومن أهم فوائدها:
- تفتيح البشرة وتنقيتها، لأنها تحتوي على مركبات تساعد على تجديد خلايا الجلد ومحاربة التصبغات.
- محاربة التجاعيد بفضل فيتامين E ومضادات الأكسدة اللي بتبطئ علامات التقدم في السن.
- تطويل الشعر وتكثيفه، من خلال استخدام زيت نواة التمر المستخرج منها، واللي بيوصل التغذية لفروة الرأس وبيقوي البصيلات.
- علاج تقصف الشعر، لأن الزيوت الطبيعية فيها بترطب الشعر وتقلل الهيشان.
- ممكن تطحني نواة التمر بعد تحميصها، وتستخدمي البودرة في عمل ماسكات للوجه، أو تخلطيها بزيوت طبيعية زي زيت الزيتون أو زيت جوز الهند للشعر.
للزراعة كمان أيوه نواة التمر بتعمل فرق كبير
نواة التمر مش بس مفيدة للتجميل، دي كمان ممتازة للتربة، لأنها لما تطحن وتخلط مع التربة بتحسن من جودتها، وبتساعد النباتات على النمو السريع والصحي، كمان ممكن استخدامها كبذور، فلو زرعتيها في البيت بعد نقعها، هتطلعلك شتلات نخيل صغيرة تقدر تزرعيها كديكور طبيعي وجميل.