الكوتشي الأبيض قطعة أساسية في دولاب أي حد، بيليق على كل حاجة وبيكمل أي لوك، بس المشكلة إنه بيتبهدل بسرعة! شوية تراب، نقطة مية، أو حتى لمسة بسيطة بإيد مش نضيفة، وراحت هيبة الكوتشي!
لو زهقتي من منظر الكوتشي المتوسخ، سواء كان جلد أو قماش، جبتلك الطريقة الحصرية والفعّالة اللي هتخليه يرجع جديد وكأنك لسه شارياه، في ثواني معدودة ومن غير ما تتعبي.
أولاً: تنظيف الكوتشي القماش – السر في المكونات البسيطة
المكونات:
-
ملعقة كبيرة بيكنج صودا
-
ملعقة كبيرة خل أبيض
-
فرشة أسنان قديمة
-
شوية مية دافيه
الطريقة:
-
اخلطي البيكنج صودا مع الخل الأبيض لحد ما يبقى عندك خليط شبه المعجون.
-
غطسي الفرشة في الخليط وابدأي افركي بيها الأماكن المتسخة في الكوتشي.
-
ركزي على أطراف النعل والمنطقة اللي حوالين الأصابع.
-
امسحي بفوطة مبلولة وخلي الكوتشي ينشف في الهوا.
النتيجة: الكوتشي هيبقى زاهي وبينور وكأنك أول مرة تلبسيه!
ثانياً: تنظيف الكوتشي الجلد – المعادلة السهلة من غير ما يبوظ
المكونات:
-
قطنة أو قطعة قماش ناعمة
-
شوية مية دافيه
-
نقطة صغيرة من معجون الأسنان الأبيض (مش الجل)
-
فازلين أو مرطب
الطريقة:
-
حطي نقطة معجون الأسنان على القطنة وامسحي بيها الأماكن المتسخة.
-
افركي بلطف بحركة دائرية، وامسحي فورًا بقطنة تانية مبلولة.
-
بعد ما الكوتشي ينشف، حطي طبقة خفيفة من الفازلين على الجلد علشان يرجع له اللمعة ويحافظ عليه من الجفاف.
النتيجة: الكوتشي الجلد هيبقى لامع ونضيف من غير أي خدوش.
نصائح ذهبية:
-
ما تغسليش الكوتشي القماش في الغسالة كتير علشان ميفكّش أو يتبهدل.
-
دايمًا احفظي الكوتشي في كيس قماش أو علبة لما تكوني مش بتلبسيه.
-
رشّي عليه سبراي مقاوم للمية والتراب لو بتخرجي بيه كتير.