تبحث الكثير من الأسر عن أفضل أنواع السمك لتقديم وجبات صحية وشهية، ويعد البلطي من أكثر الأنواع طلبًا في السوق المصري، ومع انتشار أسواق السمك وزيادة الإنتاج في المزارع، يقع كثيرون في حيرة: كيف نعرف إذا كان السمك بلدي طبيعي من النيل، ولا بلطي مزرعة تم تربيته في أحواض صناعية؟ الحقيقة إن الفرق بين النوعين كبير، والطعم مش بس اللي بيحكم.
أولًا: إزاي تعرف البلطي البلدي؟
يصاد السمك البلدي من بيئات طبيعية زي نهر النيل، وده بيخليه غني بالنكهات ومليان فوايد ناتجة عن تغذيته على كائنات طبيعية في الطين والرمل والمياه الجارية.
مواصفاته:
- لون البطن فاتح ومائل للبياض، أما الظهر فيكون أزرق أو فضي أو أخضر.
- ملمسه قوي ومافيهوش تورمات أو انتفاخات في البطن.
- ريحته بتكون خفيفة وطبيعية جدًا.
- بيجي بأحجام مختلفة من الصغير للكبير حسب بيئة النهر.
ثانيًا: البلطي المزارع
أما النوع التاني، فبييجي من مزارع سمكية مغلقة أو أحواض بيتم التحكم فيها صناعيًا، وبيتم إطعامه أعلاف مخصوصة عشان يكبر بسرعة، ورغم إن شكله مغري، إلا إن فيه فروقات لازم تاخد بالك منها.
مواصفاته:
- لونه بيكون غامق شوية وبيظهر تحته بقعة حمرا تحت الخياشيم.
- جسمه بيكون منتفخ خاصة في منطقة البطن.
- الطعم غالبًا بيكون مسطح ومافيهوش نكهة السمك الطبيعي.
- الحجم متقارب جدًا بين الأسماك لأنه ناتج عن تغذية موحدة.
ازاي تفرق بينهم في السوق؟
لو كنت بتشتري سمك بلطي، ركز على الآتي:
- شوف لون البطن، لو أبيض ناصع غالبًا بلدي.
- شم السمكة، البلدي ريحته طبيعية، لكن المزارع أحيانًا تكون ريحته أقرب للعلف أو الطين الصناعي.
- اضغط على بطن السمكة، لو فيها ليونة غريبة أو انتفاخ، غالبًا دي مزارع.
اختيارك للنوع الصح من السمك مش بس بيفرق في الطعم، لكنه كمان بيحمي صحتك وصحة أسرتك، البلطي البلدي دايمًا أفضل من حيث الجودة والفوائد الغذائية، فخد بالك قبل ما تشتري، وسيبك من السعر وركز في العلامة اللي بتفرق بين البلدي والمزارع.