تتزايد محاولات اختراق الحسابات الشخصية يومًا بعد يوم، وتعد تطبيقات الدردشة وعلى رأسها واتساب من أكثر التطبيقات استهدافًا من قِبل المخترقين، وبرغم أن التطبيق يتمتع بتشفير عالي، إلا أن بعض المستخدمين قد يجهلون أنهم بالفعل تحت المراقبة، دون أن يلاحظوا ذلك.
هل ممكن واتساب يتراقب؟ للأسف أيوه!
يعتمد واتساب على نظام التشفير من الطرف للطرف، لكن ده مش كافي لو حد قدر يوصلك من باب تاني، مثل:
- استخدام خاصية واتساب ويب بدون علمك.
- تثبيت تطبيقات تجسس في موبايلك.
- مشاركة رمز التحقق مع أي شخص غريب.
- توصيل حسابك بجهاز آخر عن طريق رابط أو كود QR.
العلامة اللي لازم تاخد بالك منها
افتح التطبيق وافتح “الأجهزة المرتبطة” (Linked Devices)، لو لقيت جهاز غريب مش بتاعك، أو متصفح ما استخدمتهوش قبل كده، ده إنذار واضح إن في حد فاتح حسابك من مكان تاني، الحل؟ سجل خروج فورًا من كل الأجهزة.
إشارات تانية بتأكد إن حسابك تحت المراقبة
- الرسائل المقروءة من غير ما تفتحها: لو لقيت رسائل ظهرت عليها العلامتين الزرقاوين وإنت متأكد إنك ما فتحتهاش، دي علامة قوية.
- رسائل مكتوبة مكانك: لو لقيت محادثات خرجت من رقمك وإنت ما كتبتهاش، يبقى حد بيستخدم واتسابك في الخلفية.
- تغييرات في الإعدادات: لو اتغيرت صورة البروفايل، أو الحالة، أو تم تفعيل خاصية ما بدون تدخلك.
خطوات الحماية الفورية
- فعل التحقق بخطوتين: من الإعدادات > الحساب > التحقق بخطوتين.
- امسح أي تطبيق مش معروف: راجع التطبيقات المثبتة في تليفونك.
- تأكد من تحديث التطبيق: دايمًا نزل آخر إصدار.
- راقب الأجهزة المرتبطة بشكل دوري.
خصوصيتك في خطر لو تجاهلت العلامات دي، تطبيق بسيط زي واتساب ممكن يبقى بوابة لكل أسرارك ومحادثاتك وصورك لو وقع في الإيد الغلط، خليك يقظ، وامسح أي شك من البداية قبل ما الفضيحة توصل لأبعد من كده.