بسبب الاعتماد الكبير على الإنترنت، بقى الراوتر جزء أساسي في كل بيت، ومع تسارع التطور التكنولوجي، الإنترنت بقى ضروري في الحياة اليومية سواء في العمل، التعليم، أو الترفيه، بس رغم قوة الباقات اللي بنشترك فيها، كتير مننا بيعاني من مشكلة ضعف الشبكة أو بطء سرعة النت، والسبب بيكون غالبا في المكان اللي حاطين فيه الراوتر نقدمها لكم عبر موقعنا الزهراء.
اعرف الأماكن الصح والغلط لوضع الراوتر في البيت
اختيار المكان المناسب بيفرق جداً في جودة الإشارة وفي قوة الشبكة بشكل عام.
أماكن مينفعش تحط الراوتر فيها أبدا
في أماكن معينة بتحجز الإشارة أو بتشتت الموجات اللي بيبثها الراوتر، ودي لازم نبعد عنها علشان نضمن إن الإشارة قوية ومتصلة بشكل جيد بكل أجهزة البيت، خلينا نتعرف على الأماكن دي:
- وضع الراوتر داخل الدرج أو في أماكن مغلقة زي الخزائن بيكون خطأ شائع، ده لأن الإشارة اللي بيبثها الراوتر بتحتاج مساحات مفتوحة عشان تنتشر وتوصل لكل زوايا البيت، لما نحطه في درج أو مكان مقفول، بتبقى الإشارة محجوزة جواه، وده بيفضل الشبكة ضعيفة جدا على الأجهزة التانية.
- تجنب تماما وضع الراوتر تحت طاولة أو مكتب أو كراسي، لأن الأثاث بيمنع انتشار الإشارة بشكل طبيعي، الأثاث الخشبي أو المعدني بيتسبب في امتصاص أو حجب جزء من الإشارة، وبالتالي سرعة الإنترنت بتقل وجودته بتتأثر سلبا.
- وجود الراوتر في المطبخ بيكون من أكبر الأخطاء، لأن المطبخ مليان أجهزة كهربائية زي الميكروويف والفرن الكهربي اللي بتشتغل على موجات مشابهة للراوتر، وده بيعمل تداخل في الإشارات وبيضعف الشبكة، كمان الأواني المعدنية بتعمل انعكاس للموجات وبتشتتها، وده بيؤثر سلبا على أداء الراوتر.
- لو حطيت الراوتر جنب حوائط سميكة أو شبابيك، الشبكة هتكون أضعف، لأن الإشارة هتبقى محجوبة أو متشتتة، الحوائط الخرسانية بالأخص بتمنع مرور الإشارة بسهولة، وده بيخلي الإشارة ضعيفة.
الأماكن المثالية لوضع الراوتر
بجانب الأماكن اللي لازم نبعد عنها، في أماكن مثالية لتحسين قوة الشبكة، وتجربة إنترنت أسرع وأفضل:
- أفضل مكان تحط فيه الراوتر هو في وسط البيت عشان تكون الإشارة موزعة بشكل متساوي على كل زوايا البيت، المكان ده بيكون استراتيجي لو بتحتاج الشبكة توصل لمناطق متعددة.
- كل ما ارتفع الراوتر، كل ما كانت الإشارة أفضل، لأن الأرض بتمتص جزء من الإشارة، جرب تحطه فوق رف أو مكتب عالي، وده هيحسن من أداء الشبكة ويخلي الإشارة أقوى.
- لو مش لاقي رف مناسب، فممكن تثبّت الراوتر على الحائط في مكان مفتوح بعيد عن الزوايا، وده هيخلي الشبكة تبث في مساحات أكبر.
- حافظ على الراوتر بعيد عن أي أجهزة كهربائية ضخمة بتشتغل بموجات مشابهة، زي التلفزيون أو جهاز التكييف أو غيرهم من الأجهزة اللي ممكن تضعف الإشارة بسبب التداخل الموجي.
نصائح إضافية لتعزيز سرعة الإنترنت
- لو الراوتر بقاله سنوات، الأفضل تحدثه بواحد أحدث بيدعم تقنيات حديثة لتحسين السرعة.
- لو عندك بيت كبير، ممكن تحتاج جهاز مقوي إشارة عشان الشبكة توصل للمناطق البعيدة.
- الراوترات الحديثة بتشتغل على ترددين (2.4GHz و5GHz)، الأول بيناسب المساحات الواسعة والتاني بيكون مناسب للسرعات العالية في المساحات القريبة.
- الراوترات بتيجي بتحديثات برمجية جديدة من وقت للتاني عشان تقوي الأداء وتسد الثغرات، تأكد دايما من تحديث الراوتر لأحدث إصدار.
باختصار، المكان اللي بتحط فيه الراوتر بيفرق في أداء وسرعة الإنترنت بشكل كبير. اختيار المكان الصح هيوفر عليك مشاكل ضعف الشبكة ويوفر كمان استهلاك الباقة بشكل أكبر.
