كيفية عمل الروزبيف بأسهل طريقة لعمل اللحمة الباردة وبكل سهولة

الروزبيف من الأكلات الجميلة جدا لعشاق اللحمة الباردة، ويعتبر من الأصناف الراقية التى يتناولها الناس فى المطاعم والرحلات ويمكن أن نعمله ساندوتشات للأطفال والكبار أيضا، وهو يسمى بهذا الاسم لأن لون اللحم الداخلي يكون ورديا بعد نضجه،ويعتبر من اشهر الأكلات التى يتفنن المصريين فى عملها فى المطبخ المصرى، لأن المصريين من عشاق اللحوم ويحبونها بشكل غيرعادى، لذلك سوف نقدم لكم اليوم مكونات وطريقة تحضير الروزبيف أو اللحم البارد بكل سهولة.

مكونات الروزبيف

يتكون الروزبيف من مكونات سهلة وموجودة فى المنزل ماعدا شراء عرق اللحمة من الجزار وهى كالتالي:

• 11/2 كيلو من عرق التربيانكو.
• دوبارة أوخيط ضد النار.
• ملعقة من الفلفل المجروش.
• فصوص من الثوم الصغيرة.
• جزرة مقطعة شرائح رفيعة.
• 2 ملعقة صغيرة من الملح.
• ملعقة صغيرة من الفلفل الناعم.
• ملعقة صغيرة من الزيت.
• قطعة من الزبدة أوالسمنة.
• 2 فص من الحبهان.
• 2 حبة من المستكة.
• ورقة من ورق اللورا.
• 2 عود من القرنفل.
• عود من الروز مارى.
• بصلة كبيرة مقطعة جوانح.
• 5 فصوص من الثوم.
• 2 حبة من الطماطم مقطعة.
• ملح وفلفل أسود حسب الحاجة.

طريقة الاعداد والتجهيز

1. نجيب عرق التربيانكو ونقوم بتنظيفه كويس من الدهن والشغت.
2. ونقوم بلفه بالخيط اللي ضد النارمن جميع الاتجاهات.
3. هنعمل فتحات بسن السكينة غويطة شوية ونحط الفلفل الأسود المجروش وندخل فصوص الثوم لجوه ونتأكد من انها دخلت لجوه.
4. وبسكينة حادة ورفيعة نقوم بعمل فتحات بالطول  وندخل شرائح الجزرمن الجانبين.
5. نجيب معلقتين الملح وملعقة الفلفل الناعم وملعقة الزيت ونخلطهم مع بعض وندهن بها عرق اللحمة من جميع الأتجاهات.
6. ونحضر طاسة كبيرة أو جريل ونسخنه ونحط معلقتين من الزيت وقطعة الزبدة أو السمنة والحبهان والمستكة  وورق اللورا والقرنفل وعود الروزمارى، ونحط عرق اللحمة يتحمر من جميع الأتجاهات لكى نقفل المسام.
7. بعد التحمير نشيل العرق والمنكهات اللى حطناها.
8. وفى نفس الطاسة هنزود قطعة من الزبدة وهنحط البصل الجوانح والثوم الصحيح ونشوحهم تشويح بس ميتحمرش.
9. ونضيف عليه الطماطم المقطع ونكمل تشويح ونرش عليه شوية ملح بسيطة ونحط الفلفل والبهارات.
10. نحضر صينية ونضع نصف البصل فى الصينية من تحت ونضع عرق اللحمة ونضع عليه بقية البصل من فوق، ونضع ورق اللورا والحبهان والروز مارى والقرنفل اللي شوحناهم قبل كده فى جنب الصينية مش على اللحمة.
11. ونسكب عليهم 3/4 كوب من الماء المغلي ونسكبه فى جانب الصينية ونقفل الصينية كويس بورق الزبدة وعليه ورق الفويل.
12. نضعه فى الفرن الذى تم تسخينه سابقا فى الرف اللي فوق الصاجة على درجة حرارة 220 لمدة 45 دقيقة،وبعدها نفتح عليه  ونقلب اللحمة على الناحية الثانية  ونغطيها كويس ونضعها فى الفرن مرة أخرى لمدة 45 دقيقة تانى.
13. بعد تمام النضج نخرج الصينية ونشيل عرق اللحمة ونتركه يبرد شوية وبعدها نلفه فى ورق زبدة وورق فويل  ونقفل الجوانب ونضعه فى الفريزر لمدة ساعة.
14. ثم نأخذ كل الصوص والبصل اللي فى الصينية ونشيل منهم المنكهات ونضربه فى الكبة أو الخلاط.
15. وفى طاسة صغيرة نضع 1/2 ملعقة من الزيت  وعليها 1/4 ملعقة من الدقيق ونقلبهم جيدا ونضيف اليهم الصوص ونتركه يغلى شوية ونطفي عليه.
16. بعد كده هنطلع اللحمة من الفريزر وبسكينه حامية جدا نقطع منها ونضع فى الصوص.
17. ويتم تقطيعه بالطلب  والي هيفضل نسيبه سليم لتانى يوم ونعمل منه ساندوتشات أو بجانب مكرونة اوبطاطس ومن الممكن ان نحتفظ به فى الفريزر ملفوف لأى وقت احنا عاوزينه وبالهنا والشفا.