البيض من الأطعمة الأساسية في كل بيت، لكنه دايما بيخلينا نتساءل عن سبب اختلاف لون الصفار ما بين الفاتح والغامق، بعض الناس يعتقدوا إن البيض الغامق أكثر فائدة، والبعض التاني بيشوف إن مفيش فرق، لكن الحقيقة إن لون صفار البيض بيعتمد على عوامل كتير، وده اللي هنعرفه في المقال ده.
ليه صفار البيض بيكون أوقات فاتح وأوقات غامق؟
الفرق الأساسي في لون الصفار بيرجع لنوع الأكل اللي بتاكله الدجاجة، لما بتاكل الدجاجة أكل طبيعي غني بالكاروتينات زي الذرة، الجزر، والورقيات الخضراء، ده بيخلي الصفار لونه غامق، أما لو كان غذائها معتمد أكتر على الحبوب الخفيفة زي القمح، بيكون الصفار أفتح.
هل لون الصفار بيأثر على القيمة الغذائية؟
رغم إن البيض الغامق ممكن يكون فيه نسبة أعلى شوية من بعض الفيتامينات زي فيتامين A و E، لكن الفرق مش كبير لدرجة إنه يخلي واحد أحسن من التاني بشكل واضح، الاتنين فيهم بروتين عالي الجودة، وكميات متقاربة من الدهون والمعادن.
أيهما أفضل للطهي؟
لون الصفار ممكن يأثر على شكل الأكل، فالصفار الغامق بيدي لون أقوى للأطباق زي المعجنات والكعك، في حين إن الفاتح بيكون مناسب أكتر للوصفات اللي عايزة لون محايد، لكن من حيث الطعم، الفرق طفيف جدا.
إزاي تختار البيض الصحي؟
الأهم من لون الصفار هو جودة البيضة نفسها. البيض العضوي أو اللي جاي من دجاج بيتربى بطريقة طبيعية بيكون الخيار الأفضل، وكمان لازم تتأكد من نضارة البيض عن طريق اختبار بسيط، زي وضعه في ماء بارد، لو غرق فهو طازج، ولو طفا فمعناه إنه قديم.
لون صفار البيض بيعتمد على أكل الدجاج، لكنه مش مؤشر أساسي على القيمة الغذائية، المهم هو اختيار بيض عالي الجودة بغض النظر عن لونه، والتأكد من نضارته قبل الاستخدام.