الزبادي من الأكلات الصحية اللي بيعتمد عليها ناس كتير في نظامهم الغذائي، سواء للكبار أو الأطفال، لأنه مليان بالبروتين، الكالسيوم، والبكتيريا النافعة اللي بتحسن الهضم، لكن مش كل الطرق اللي بنستهلك بيها الزبادي صحيحة، وبعض العادات الغلط ممكن تخليه خطر على صحتك بدل ما يكون مفيد، خبراء التغذية حذروا من بعض الأخطاء اللي كتير من الناس بيقعوا فيها عند تناول الزبادي، واللي ممكن تأثر بالسلب على الجهاز الهضمي والمناعة.
أخطاء شائعة في تناول الزبادي ممكن تضر صحتك
1. أكل الزبادي مع الفواكه الحمضية
ناس كتير بتحب تضيف الفواكه زي البرتقال، الليمون، أو الأناناس على الزبادي علشان طعمه يبقى أحلى، لكن الجمع بين الزبادي والفواكه الحمضية ممكن يسبب اضطرابات في المعدة، خاصة عند الأطفال، لأنه بيزود الحموضة وبيؤثر على الهضم.
2. تسخين الزبادي أو إضافته للأكلات الساخنة
البعض بيستخدم الزبادي في الطبخ أو بيسخنه قبل الأكل، لكن ده بيقتل البكتيريا النافعة اللي فيه، وبيخليه يفقد أهم فوائده الغذائية، الأفضل تناوله بارد للحفاظ على فوائده كاملة.
3. تناول الزبادي على معدة فاضية في الصبح
بالرغم من إن الزبادي مفيد، إلا إن أكله لوحده أول ما تصحى ممكن يسبب تهيج للمعدة عند بعض الأشخاص، وده لأن أحماض المعدة بتكون قوية في الصبح، الأفضل تاكله بعد وجبة خفيفة أو تضيف عليه معلقة عسل لتحسين تأثيره على الهضم.
4. اختيار الزبادي المحلى بالسكر الصناعي
الزبادي اللي بيكون مضاف له نكهات صناعية وسكر مكرر بيكون أقل في الفوائد وأعلى في السعرات الحرارية، وده ممكن يسبب زيادة في الوزن ومشاكل في الجهاز الهضمي، الأفضل تختار الزبادي الطبيعي بدون إضافات أو تحليه بعسل طبيعي.