مرض الزهايمر من الأمراض الخطيرة اللي بتأثر على الذاكرة وبتخلي الشخص ينسى تفاصيل حياته وأقرب الناس ليه. للأسف، في أسباب كتير بتساعد في ظهور المرض ده، ولو تجاهلتها، ممكن تكون عرضه ليه في المستقبل، في المقال ده هنتكلم عن العوامل اللي ممكن تزود خطر الإصابة بالزهايمر، وإزاي تتجنبها قبل فوات الأوان.
نمط الحياة غير الصحي
الأكل الغلط وعدم ممارسة الرياضة من أهم الأسباب اللي بتؤدي لضعف وظائف المخ، تناول الأكلات السريعة، اللي مليانة دهون مشبعة وسكريات، بيزود نسبة الإصابة بالأمراض اللي بتأثر على الذاكرة، كمان قلة الحركة بتسبب مشاكل في تدفق الدم للمخ، وده بيأثر على أداؤه، عشان كده لازم تهتم بأكلك وتحرص على ممارسة الرياضة بانتظام.
قلة النوم والتوتر المستمر
النوم الكافي بيساعد المخ على الراحة وإصلاح نفسه، لكن لو بتسهر كتير ومبتنامش كويس، ده بيزود خطر الإصابة بالزهايمر، كمان، التوتر المستمر والضغط العصبي بيأثروا على صحة الدماغ، وبيخلوه أكتر عرضة للأمراض، حاول تنظم وقت نومك وتبعد عن الضغوط اليومية عشان تحافظ على صحة مخك.
عدم تنشيط العقل
الدماغ محتاج تمارين زي الجسم، ولو مهتمتش بتنشيطه، هتلاقي ذاكرتك بتضعف مع الوقت، القراءة، حل الألغاز، وتعلم حاجات جديدة بتساعد على تقوية المخ وتقليل خطر الإصابة بالزهايمر. لو كنت بتقضي وقتك كله في الراحة بدون أي نشاط ذهني، حاول تغير عاداتك وتبدأ في تحديات عقلية يومية.
الأمراض المزمنة والإهمال الصحي
الإصابة ببعض الأمراض زي السكري، الضغط العالي، والسمنة بيزودوا خطر التعرض للزهايمر، ده لأنهم بيأثروا على تدفق الدم للمخ، وده بيسبب تدهور في خلاياه، عشان كده، لو عندك أي مرض مزمن، لازم تتابع حالتك الصحية بانتظام وتاخد العلاج المناسب عشان تحمي نفسك.
احذر قبل فوات الأوان
الوقاية من الزهايمر مش مستحيلة، ولو بدأت من دلوقتي في تغيير عاداتك، هتحمي نفسك في المستقبل، تناول الأكل الصحي، مارس الرياضة، نام كويس، نشط عقلك، وحافظ على صحتك العامة، متستناش لما تندم، ابدأ من النهاردة وخد خطوة لحماية مخك وحياتك.